මේ රට කොටස් වශයෙන් බෙදන්නට ගත්තොත් රටේ මොන වගේ තත්ත්වයක් ඇතිවෙයිද කියා අපි කල්පනා කළ යුතු යැයි අග්‍රාමාත්‍ය ආචාර්ය දි.මු. ජයරත්න මහතා පවසයි.

ජනාධිපතිතුමාගේ ඓතිහාසික අයවැය ලේඛනය හමුවේ විපක්ෂ නායකතුමා ගොළුවෙක් බවට පත් ව සිටින බවත් ත්‍රස්තවාදය පරාජය කළ ජනාධිපති මහින්ද රාජපක්ෂ මහතාට ජනතාවගේ ප්‍රණාමය හිමිවෙන බවත් ආණ්ඩු පක්ෂයේ ප්‍රධාන සංවිධායක, ජල සම්පාදන හා ජලාපවහන අමාත්‍ය දිනේෂ් ගුණවර්ධන මහතා පවසයි.

මෙවර අයවැයෙන් සමස්ත ජනතාවට ම සහන ලැබී තිබෙන බවත් දස වසරක සංවර්ධන සැලැස්ම හා රජයේ වැඩපිළිවෙළ නිසා සියලු අංශවලට සහන දීමට හැකි වී තිබෙන බවත් විදුලිබල හා බලශක්ති අමාත්‍ය පවිත්‍රා දේවී වන්නිආරච්චි මහත්මිය පැවසුවාය.

1948න් පසුව ජනතාවට වැඩි ම සහන ලබා දුන් අයවැය මෙය බව විදේශ රැකියා ප්‍රවර්ධන හා සුබසාධන අමාත්‍ය ඩිලාන් පෙරේරා මහතා පවසයි.

එදා ආණ්ඩුක්‍රම ව්‍යවස්ථාවට පිටින් වැඩ කළ එජාප රජය අද යහපාලනය හා පාරදෘශ්‍ය භාවය ගැන කතා කරනවා යැයි පරිසර හා පුනර්ජනනීය බලශක්ති අමාත්‍ය සුසිල් ප්‍රේමජයන්ත් මහතා පවසයි.

සියලු දේශපාලන බලවේග මහින්ද රාජපක්ෂ ජනාධිපතිතුමා වටා ඒකරාශි වීම නිසා බොරු චෝදනා කරන්න එපා යැයි ද මොන කතා කීවත් ජනතාව සිටින්නේ ජනාධිපතිතුමා සමඟ නිසා ආණ්ඩුවට එක් වී වැරදි තිබේ නම් කතා කර හදා ගනිමු යැයි ද ක්‍රීඩා අමාත්‍ය මහින්දානන්ද අලුත්ගමගේ මහතා පවසයි.

විධායක ජනාධිපති ක්‍රමයට අකමැති නම් මැතිවරණයකට නොගොස් ඡන්දය නොදී සිටිය හැකි අතර කිහිපදෙනෙකුට උවමනා විදිහට කටයුතු කරන්න බැරි බවත් බොහෝ දෙනාගේ කැමැත්ත මත කටයුතු කිරීම ප්‍රජාතන්ත්‍රවාදය බවත් අග්‍රාමාත්‍ය දි.මු. ජයරත්න මහතා පවසයි.