යුද්ධයෙන් පසුව අපේ ආණ්ඩුවට ලැබුණේ අලුත් අභියෝගයක් බවත් නැවත පදිංචි කළ ජනතාවට අවශ්‍ය සියලු දේ දීමට මේ රජයට සිදු වුණ බවත් සාම්ප්‍රදායික කර්මාන්ත හා කුඩා ව්‍යවසාය සංවර්ධන අමාත්‍ය ඩග්ලස් දේවානන්දා මහතා පවසයි.

1989 ඉඳලා 1994 දක්වා පැවති එජාප රජයේ කාලයේ දී විපක්ෂයේ කිසි ම මහජන නියෝජිතයෙකුට ගමේ සංවර්ධන කටයුතු සඳහා එක රුපියල් 10.00ක් වත් ලබා දී නැති බවත් අපේ රජය විපක්ෂයේ සියලුම මන්ත්‍රීවරුන්ට රුපියල් ලක්ෂ 50 බැගින් ලබා දී ඇති බවත් පාර්ලිමේන්තු කටයුතු අමාත්‍ය සුමේධා ජී. ජයසේන මහත්මිය පැවසුවාය.

හැම ජාතියකට ම ප්‍රදේශයකට ම වැඩ කරන ක්‍රියාවලියක් ආර්ථික සංවර්ධන අමාත්‍යාශයේ පවතින බවත් ග්‍රාමීය ජනතාව වෙනුවෙන් වැඩකරන්න මෙවර අය-වැයෙන් ජනාධිපතිතුමා විශාල මුදලක් වෙන් කර ඇති බවත් ආර්ථික සංවර්ධන නියෝජ්‍ය අමාත්‍ය, විශේෂ ව්‍යාපෘති අමාත්‍ය එස්.එම්. චන්ද්‍රසේන මහතා පවසයි.

කම්කරුවන්ට රක්ෂණය මෙන් ම විශ්‍රාම වැටුප් ක්‍රමයක් ඇති කිරීමට ද අවධානය යොමු ව ඇති බවත් ඇඟලුම් ක්ෂේත්‍රයට විශ්‍රාම වැටුපක් යෝජනා කරන විට අර්ථසාධක අරමුදල්‍ ප්‍රශ්නයක් ගෙනවිත් එය කඩාකප්පල් කළ බවත් ජ්‍යෙෂ්ඨ අමාත්‍ය ආතාවුද සෙනෙවිරත්න මහතා පවසයි.

ඵලදායී ශ්‍රම බලකායක් රටේ ආර්ථික, සමාජයීය සංවර්ධනයට දායක කර ගැනීම රජයේ අරමුණ බව කම්කරු හා කම්කරු සබඳතා නියෝජ්‍ය අමාත්‍ය රියර් අද්මිරාල් සරත් වීරසේකර මහතා පවසයි.

කම්කරු ජනතාව ගැන මෙවර අයවැය ලේඛනයෙන් වැදගත් කරුණු රැසක් ඉදිරිපත් කර ඇති බවත් ඡන්දයක් තිබුණත් නැතත් මෙවර වැදගත් අය-වැය ලේඛනයක් ඉදිරිපත් කර ඇති බවත් කම්කරු හා කම්කරු සබඳතා අමාත්‍ය ගාමිණී ලොකුගේ මහතා පවසයි.

මේ රටේ වැඩකරන ජනතාව වෙනුවෙන් මෙවර අය-වැයෙන් විශේෂ සහන රැසක් ලබාදීමට -ජනාධිපතිතුමා කටයුතු කර ඇති බව ආණ්ඩු පක්ෂයේ ප්‍රධාන සංවිධායක, ජල සම්පාදන හා ජලාපවහන අමාත්‍ය දිනේෂ් ගුණවර්ධන මහතා පවසයි.

යුද පිළිකාව ඇති වූ දා සිට සිටි රාජ්‍ය නායකයන්ට වඩා රට ගැන සිතා කටයුතු කළ එක ම රාජ්‍ය නායකයා ජනාධිපති මහින්ද රාජපක්ෂ මහතා බව වරාය මහාමාර්ග හා නාවුක කටයුතු ව්‍යාපෘති අමාත්‍ය රෝහිත අබේගුණවර්ධන මහතා පවසයි.