සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා සහ ලෝක සෞඛ්‍ය සංවිධානයේ මෙරට නියෝජිත ආචාර්ය අලාකා සිං මහත්මිය අතර හමුවක් පසුගියදා සෞඛ්‍ය අමාත්‍යාංශයේ දී පැවැති අතර, එම සාකච්ඡාවෙන් අනතුරුව සෞඛ්‍ය අමාත්‍යවරයා මේ බව සඳහන් කළේය.
ජනතාවගේ සෞඛ්‍ය ආරක්ෂණය, සුබසාධනය හා ජීවන තත්ත්වය වැඩි දියුණු කිරීම මෙන්ම ආර්ථික, සාමාජික, සංස්කෘතික හා විද්‍යාත්මක අංශයන්හි ප්‍රගතිය අරමුණු කරගෙන අන්තර්ජාතික සංවිධාන රැසක් මෙරට නව ව්‍යාපෘතින් ක්‍රියාවට නැංවීමට දැනටමත් සාකච්ඡා පවත්වමින් සිටින බව පෙන්වා දුන් සෞඛ්‍ය අමාත්‍යවරයා ලෝක සෞඛ්‍ය සංවිධානය, යුනිසෙෆ් වැනි අන්තර් ජාතික සංවිධාන රැසක් දැනටමත් මෙරට සෞඛ්‍ය සේවා පද්ධතිය ඉහළ නැංවීමට ක්‍රියාත්මක කරන ව්‍යාපෘති අඛණ්ඩව ඉදිරියට පවත්වාගෙන යාමට ද එකඟත්වය ප්‍රකාශ කර ඇති බව සඳහන් කළේය.
මෙහිදී අදහස් දක්වමින් ලෝක සෞඛ්‍ය සංවිධානයේ මෙරට නියෝජිත ආචාර්ය අලාකා සිං මහත්මිය රටවල් අතර සහයෝගීතාව හා සම්බන්ධීකරණය ඉහළ නැංවීම තුළින් මෙන්ම ව්‍යාපෘති නිසි පරිදි කළමනාකරණය කරගනිමින් සෞඛ්‍ය ක්ෂේත්‍ර‌යේ අභියෝග ජයගෙන පවතින ගැටලු නිරාකරණය කරගත හැකි බව ද පෙන්වා දුන්නාය.
නව සෞඛ්‍ය හා ජනමාධ්‍ය අමාත්‍යවරයා ව්‍යාපෘතින් ඵලදායීව ක්‍රියාත්මක කිරිමට අනුගමනය කරන වැඩපිළිවෙලට ලෝක සෞඛ්‍ය සංවිධානය වෙනුවෙන් සිය ස්තූතිය පුද කරන බවත්, එම වැඩපිළිවෙළ ඇගයීමට ලක් කරන බව ද ඇය පැවසුවාය.
මෙම සාකච්ඡාවේ දී වැඩිදුරටත් අදහස් දැක් වූ ලෝක සෞඛ්‍ය සංවිධානයේ මෙරට නියෝජිතවරිය ශ්‍රී ලංකාවේ වාහක රෝග පාලනය, මර්දනය සහ කළමනාකරණය විශිෂ්ට මට්ටමකට ගෙන යා යුතු බවත්, ලෝක සෞඛ්‍ය සංවිධානය හා එක්සත් ජාතීන්ගේ සංවිධානය සමග එක්ව දැනට මෙරට පවතින සෞඛ්‍ය හා අනෙකුත් ගැටලු පිළිබඳ නිරන්තර දැනුවත් කිරීමක් හා නිරන්තර ක්‍රියාකාරී යාන්ත්‍රණයක් ඇති කිරීමට කටයුතු කරන බවත්, මෙරට ළදරුවන්ගේ සහ ගැබිණි මව්වරුන්ගේ පෝෂණ තත්ත්වය ඉහළ නැංවීම වෙනුවෙන් ලෝක සෞඛ්‍ය සංවිධානය නිරන්තරයෙන් කැපවෙන බව ද සඳහන් කළාය.
ලෝක සෞඛ්‍ය සංවිධානයේ මෙරට නියෝජිත ආචාර්ය අලාකා සිං මහත්මියව වැඩිදුරටත් දැනුවත් කළ සෞඛ්‍ය හා ජනමාධ්‍ය අමාත්‍යවරයා මෙරට ක්‍රියාත්මක වු ව්‍යාපෘති නිසි ඇගයීමකට හා කළමනාකරණයට පියවර නොගැනීම තුළ පසුගිය කාලයේ බොහොමයක් ඉළක්ක සපුරා ගැනිමටත්, අපේක්ෂිත කරුණු සාක්ෂාත් කර ගැනිමටත් නොහැකිවු බවත් ඉදිරියේ දී එවන් තත්ත්වයක් ඇති නොවීමට නවීන තාක්ෂණය ද උපයෝගී කර ගනිමින් ක්‍රියාත්මක වන බවද සඳහන් කළේය.
මෙම අවස්ථාවට සෞඛ්‍ය සහ ජනමාධ්‍ය නියෝජ්‍ය අමාත්‍ය වෛද්‍ය හංසක විජේමුණි, සෞඛ්‍ය අමාත්‍යාංශයේ වැඩබලන ලේකම් වත්සලා ප්‍රියදර්ශනී, සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන යන මහත්ම මහත්මීන් එක්ව සිටියහ.
