එක්සත් රාජධානිය විසින් ශ්‍රී ලාංකිකයන් 04 දෙනෙකු වෙත සම්බාධක පැනවීම පිළිබඳ වාර්තාවක් ඉදිරිපත් කිරීමට අමාත්‍ය කමිටුවක් පත්කළ බව කැබිනට් ප්‍රකාශක සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා
පැවසීය.
අද(02) රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්‍ය හමුවට එක්වෙමින් අමාත්‍යවරයා මේ බව පැවසීය.
මෑතකදී ශ්‍රී ලාංකිකයන් 04 දෙනෙකුට එරෙහිව එක්සත් රාජධානිය විසින් සම්බාධක පැනවීමට ගනු ලැබ ඇති තීරණය පිළිබඳව ඊයේ පැවති අමාත්‍ය මණ්ඩල රැස්වීමේදී අවධානය යොමු වී තිබේ. ඒ සම්බන්ධයෙන් කරුණු අධ්‍යයනය කර ගත යුතු ඉදිරි පියවර පිළිබඳව අමාත්‍ය මණ්ඩලය වෙත නිර්දේශ සහිත වාර්තාවක් ඉදිරිපත් කිරීම පිණිස පහත සංයුතියෙන් යුත් අමාත්‍ය කමිටුවක් පත් කිරීමටත්, එකී කමිටුවේ කාර්යයන් සඳහා අවශ්‍ය යැයි සැලකෙන, අදාළ විෂය පිළිබඳව ප්‍රවීණතාවක් සහිත අන් කවර හෝ නිලධාරි‍යකුගේ/විද්වතකුගේ සේවය ලබා ගැනීම පිණිස කමිටුව වෙත බලය පැවරීමටත් අමාත්‍ය මණ්ඩලය විසින් තීරණය කළ බව අමාත්‍ය වෛද්‍ය නලින්ද ජයතිස්ස මහතා වැඩිදුරටත් පැවසීය. එම අමාත්‍ය මණ්ඩල කමිටුවේ සමාජිකයන් පහත පරිදි වේ.
* ගරු විජිත හේරත් මැතිතුමා
විදේශ කටයුතු, විදේශ රැකියා සහ සංචාරක අමාත්‍ය
* ගරු (නීතිඥ) හර්ෂණ නානායක්කාර මැතිතුමා
අධිකරණ සහ ජාතික ඒකාබද්ධතා අමාත්‍ය
* ගරු අරුණ ජයසේකර මහතා
ආරක්ෂක නියෝජ්‍ය අමාත්‍ය
