මහනුවර දිස්ත්‍රික්කයේ මැදදුම්බර ප්‍රදේශයේ ඉදිවන ගෝනගලතැන්න ව්‍යාපෘතිය සඳහා රුපියල් මිලියන 120 ක මුදලක් වෙන් කොට ඇති අතර, මේ වන විටත් මිලියන 55 කට අධික මුදලක් වැය කොට සංවර්ධනය කටයුතු සිදු කොට තිබේ. 2017 වසර අවසන් වන විට එම ව්‍යාපෘතියේ වැව් බැම්මේ ඉදි කිරීම්, වාන ඉදිකිරීම සහ සොරොව්ව ඉදි කිරීමේ කටයුතු සිදු කොට අවසන් කිරීමට නියමිතය.
මෙම ව්‍යාපෘති දෙකට අමතරව මිනිපේ වම් ඉවුර ඇළ පුනරුත්ථාපනය කිරීමේ කටයුතු ද වාරිමාර්ග දෙපාර්තමේන්තුව මගින් ආරම්භ කොට ඇති අතර, මෙම ව්‍යාපෘති සඳහා මිලියන එක් දහස් අටසියයකට වැඩි මුදලක් වෙන් කොට තිබේ. ආරම්භක අවධියේ පවතින මෙම ව්‍යාපෘතියේ මූලික අදියරේ වැඩකටයුතු මේ වන විට සිදු කරමින් පවතින අතර, ඒ සඳහා රුපියල් මිලියන 300 ක පමණ මුදලක් වැය කොට තිබේ.
වාරිමාර්ග දෙපාර්තමේන්තුව මගින් මහනුවර දිස්ත්‍රික්කය තුළ ක්‍රියාත්මක කරන මෙම මහා පරිමාණ වාරි ව්‍යාපෘතිවලට අමතරව ගොවිජන සංවර්ධන දෙපාර්තමේන්තුව මගින් ද මහනුවර දිස්ත්‍රික්කය තුළ සුළු වාරිමාර්ග ව්‍යාපෘති 28 ක් සංවර්ධනය කිරීම ආරම්භ කොට තිබේ. ඒ සඳහා රුපියල් මිලියන 38 ක මුදලක් වෙන් කොට තිබේ.
ඒ අනුව මහනුවර දිස්ත්‍රික්කයේ වාරිමාර්ග ක්ෂේත්‍රය නගා සිටුවීම සඳහා දැවැන්ත වැඩපිළිවෙළක් දියත් වෙමින් තිබෙන අතර, මෙවැනි මූල්‍යමය වටිනාකමකින් යුත් සංවර්ධන ව්‍යාපෘති මීට පෙර මහනුවර දිස්ත්‍රික්කය තුළ ක්‍රියාත්මක කොට නොමැත.
