සිවිල් නඩු විධාන සංග්‍රහය (සංශෝධන) පනත් කෙටුම්පත දෙවැනි වර කියවීමේ අද(23) පාර්ලිමේන්තුවේ පැවති විවාදයට එක්වෙමින් අමාත්‍යවරයා මේ බව පැවසීය.
වැඩිදුරටත් අදහස් දැක් වූ අමාත්‍යවරයා මෙසේ පැවසුවේ මේ වන විට යුක්තිය පසිඳලීමේ ක්‍රියාවලියට අදාළ පනත් 45 කට වැඩි සංඛ්‍යාවක් සම්මත කර ගෙන ඇති බවයි.නඩු තීන්දුවක් දුන් විට විද්‍යුත් තැපැල් ක්‍රමය මඟින් යැවීමට හැකි නම් එය කාර්යක්ෂම වෙන බවද හෙතෙම පැවසීය.
වැඩිදුරටත් අදහස් දැක් වූ අමාත්‍යවරයා මෙසේ පැවසීය.
සිතාසි බාර දී ගත නොහැකි තැන් තිබෙනවා. දික්කසාද නඩු සම්බන්ධව වැඩියි. යම් කරුණු නිසා දික්කසාද වීමට අධිකරණයට යන විට අනෙක් පාර්ශ්වය විදේශගත වෙලා. විදේශ රටට සිතාසි බාර දීමට සිදු වීමේදී විද්‍යුත් ක්‍රමයට යැවීමට සිදු වෙනවා. දැනට මෙරට පවතින දික්කසාද පනත ඉවත් කර අලුත් පනත් කෙටුම්පතක් සකස් කර තිබෙනවා. වසර ගණනක් නඩු විභාග නොපවත්වා නඩු අවසන් කරන විදියට එය සකස් කර තිබෙනවා. විදෙස් රටවල දෙන දික්කසාද නඩු තීන්දු ලංකාව තුළ නොපිළිගන්නා තත්ත්වයක්, ක්‍රියාත්මක කළ නොහැකි තත්ත්වයක් තිබෙනවා. ඒ සඳහා විදේශ නඩු තීන්දු බලාත්මක කිරීමේ පනත ගෙන එනවා.
