ශ්‍රී ලංකා නාවික හමුදාවේ අභිමානවත් 74 වන සංවත්සරය නිමිත්තෙන් නාවික හමුදාවට සෙත් පතා ආගමික වැඩසටහන් මාලාවක් පැවැත්වීමට නාවික හමුදාව කටයුතු සංවිධානය කර ඇත. එම ආගමික වැඩසටහන් මාලාව ආරම්භ කරමින්, කංචුක පූජාව සහ ධජ ආශිර්වාද පුණ්‍ය මහෝත්සවය රුවන්වැලි මහ සෑ රදුන් අබියස සහ ජය ශ්‍රී මහා බෝ සමිඳුන් අබියසදීත්, ක්‍රිස්තියානි දේව මෙහෙය කොටහේන, ශාන්ත ලුසියා ආසන දෙව්මැදුරේදීත් සහ ඉස්ලාම් දේව මෙහෙය කොළඹ කොටුව, චැතැම් වීදියේ ජුම්මා පල්ලියේදීත් පැවැත්වීමට කටයුතු කෙරිණි.
ඒ අනුව, අධ්‍යක්‍ෂ ජෙනරාල් පුහුණු, රියර් අද්මිරාල් ධම්මික විජේවර්ධන ගේ ප්‍රධානත්වයෙන්, නාවික හමුදාවට අශිර්වාද පතා 2024 දෙසැම්බර් මස 02 වන දින කොළඹ, ශ්‍රී පොන්නම්බලවානේස්වරර් දේවස්ථානයේදී එම දේවස්ථානයේ නජේන්ද්‍රන් ශර්මා සුරේන්ද්‍රන් හින්දු පූජකතුමාගේ මෙහෙයවීමෙන් පැවති මෙම හින්දු ආගමික වැඩසටහන මඟින්, රට වෙනුවෙන් දිවිපිදු සහ ආබාධිත තත්වයට පත්වූ වීරෝධාර නාවික රණවිරුවන්හට මෙන්ම දැනට සේවයේ නියුතු සහ විශ්‍රාමික සියලුම නාවික පුද්ගලයින් සහ ඔවුන්ගේ පවුල්වල සාමාජිකයන්හටත්, සමස්ත නාවික හමුදාවටත් 74 වන සංවත්සරය වෙනුවෙන් ආශිර්වාද ප්‍රාර්ථනා කරන ලදී.
මෙම හින්දු ආගමික වැඩසටහන සඳහා බටහිර නාවික විධානයේ නියෝජ්‍ය ආඥාපති හා නාවික අණභාර නිලධාරී (වැලිසර), කොමදෝරු බුද්ධික ජයවීර, අධ්‍යක්‍ෂ ඒකාබද්ධ සැපයුම් හා සේවා කලමනාකරණ පද්ධතිය හා අධ්‍යක්‍ෂ නාවික අයවැය කොමදෝරු දුලිත දේවප්‍රිය, අණදෙන නිලධාරී ශ්‍රී ලංකා නාවික නෞකා රංගල කපිතාන් නිලංග ධර්මරත්න ඇතුළු නාවික හමුදා මූලස්ථානයට සහ බටහිර නාවික විධානයේ ආයතන, නෞකා හා යාත්‍රාවන්ට අනුයුක්ත නාවික පුද්ගලයන් පිරිසක් සහභාගී වී සිටියහ.
