නුවරඑළිය මහ නගර සභාව වාර්ෂිකව සංවිධානය කරන, නුවරඑළිය වසන්ත සැණකෙළිය ඊයේ (01) පෙරවරුවේ ආරම්භ වූ අතර මෙවර වසන්ත සැණකෙළිය උත්කර්ෂවත් අන්දමින් පැවැත්වීමට පියවර ගෙන ඇති බවනුවරඑළිය නාගරික කොමසාරිස් එච්.එම්. බණ්ඩාර මහතා පැවසීය.
නුවරඑළිය - බදුල්ල ප්‍රධාන මාර්ගයේ නුවරඑළිය මධ්‍යම වෙළඳපොළ ඉදිරිපිට මෙම සමාරම්භක උත්සවය පැවති අතර එහි ප්‍රධාන ආරාධිතයා ලෙස මධ්‍යම පළාත් ප්‍රධාන ලේකම් ජී.එච්.එම්. අජිත් ප්‍රේමසිංහ මහතා සහභාගි විය. අලංකාර සංස්කෘතික අංග සහ පාසල් තුර්‍ය වාදන කණ්ඩායම් ඇතුළු අංග රැසකින් සමන්විතව උත්සවය ආරම්භ විය.
වසන්ත සැණකෙළිය අප්‍රේල් මාසය පුරාවට පැවැත්වෙන අතර තුරග තරග, මෝටර් රථ හා මෝටර් බයිසිකල් ධාවන තරග, මල් දැක්ම, සරුන්ගල් තරග ඇතුළු ඉසව් රැසකින් සමන්විත වේ.
මෙම අවස්ථාව ට, නුවරඑළිය දිස්ත්‍රික් ලේකම් තුෂාරි තෙන්නකෝන්, දෙස් විදෙස් සංචාරකයින් ඇතුළු පිරිසක් එක්ව සිටියහ.
