ශ්රී ලංකාව තුළ විවෘත පාලනය, විනිවිදභාවය සහ වගවීම තහවුරු කිරීමේ අරමුණින් පැවති “විවෘත රාජ්ය හවුල්කාරිත්ව (OGP) කලාපීය ඉගෙනුම් හුවමාරු වට මේස සාකච්ඡාව” සඳහා විද්යා හා තාක්ෂණ අමාත්ය මහාචාර්ය ක්රිෂාන්ත අබේසේන මහතා සහභාගී වූ බව එම අමාත්යංශය සඳහන් කරයි.
එක්සත් රාජධානියේ ප්රජාතන්ත්රවාදය සඳහා වූ වෙස්ට්මිනිස්ටර් පදනම (Westminster Foundation for Democracy - WFD) සංවිධානය කරන ලද මෙම විශේෂ ජාත්යන්තර සමුළුව තායිලන්තයේ බැංකොක් නුවරදී පසුගියදා (10) පැවැත්විණි.
මෙම සමුළුව සඳහා ශ්රී ලංකාව, ඉන්දුනීසියාව, මාලදිවයින සහ තායිලන්තය යන රටවල ජ්යෙෂ්ඨ ප්රතිපත්ති සම්පාදකයින් සහ නියෝජිතයින් සහභාගී වී තිබේ.
කලාපීය අසල්වැසි රටවල් විවෘත පාලන ප්රතිසංස්කරණ ක්රියාත්මක කිරීමේදී ලබා ඇති සාර්ථකත්වයන් සහ අභියෝග පිළිබඳ අත්දැකීම් බෙදාහදා ගැනීම මෙම සාකච්ඡාවේ ප්රධාන අරමුණ වේ.
ශ්රී ලංකාව මින් පෙර විවෘත රාජ්ය හවුල්කාරිත්ව (OGP) ක්රියාවලියෙන් අක්රීය වී තිබූ අතර, එය නැවත සක්රීය කිරීම සහ ඒ සඳහා වන ජාතික ක්රියාකාරී සැලැස්ම (National Action Plan) සකස් කිරීමේ මාර්ග සිතියම පිළිබඳවව එහිදී දීර්ඝ වශයෙන් සාකච්ඡා විය.
විවෘත පාලන ප්රතිසංස්කරණ සඳහා දේශපාලන නායකත්වයේ සහයෝගය ලබා ගැනීම සහ එම ප්රතිසංස්කරණ හුදෙක් ලේඛනවලට පමණක් සීමා නොවී ප්රායෝගිකව ජනතාවට සමීප කරවන ආකාරය පිළිබඳව ද මෙම සාකච්ඡාවේදී අවධානය යොමු වී තිබේ.
මෙම වටමේස සාකච්ඡාව සඳහා ශ්රී ලංකාව නියෝජනය කරමින් පාර්ලිමේන්තු මන්ත්රී ෂානක්කියන් රාසමණික්කම් මහතා, OGP ආසියා පැසිෆික් කලාපීය ප්රධානී ස්වාති මෙහෙතා (Swati Mehta) සහ එක්සත් රාජධානියේ විදේශ, පොදුරාජ්ය මණ්ඩලීය සහ සංවර්ධන කාර්යාලයේ (FCDO) නියෝජිතයින් ද එක් විය.
