ආරක්ෂිත ආසන බඳ පටි පැළඳීම මගින් සුරක්ෂිත රිය ධාවනයටත් මගී හා දේපළ ආරක්ෂාවටත් මහත් පිටුවහලක් ලැබෙන බව මාර්ග ආරක්ෂාව පිළිබඳ ජාතික සභාවේ සභාපති මංජුල කුලරත්න මහතා පවසයි.
අධිවේගී මාර්ගවල ගමන් ගන්නා සියලුම සැහැල්ලු වාහනවල පසුපස ආසනවල සිටින මගීන් ද ආසන පටි පැළඳීම අනිවාර්ය කිරීම 2025.08.01 වන දින සිට ක්රියාත්ම කිරීම පිළිබඳ රියැදුරන් සහ මගී ජනතාව දැනුම්වත් කිරීම සඳහා කොට්ටාව අධිවේගී මාර්ග පිවිසුමේ පැවති අත් පත්රිකා බෙදාදීමේ අවස්ථාවට එක්වෙමින් සභාපතිවරයා මේ අදහස් දැක්වීය.
‘මාර්ග ආරක්ෂණ ක්රියාකාරී සැලැස්ම’ ප්රකාරව ප්රවාහන, මහාමාර්ග, වරාය සහ සිවිල් ගුවන් සේවා අමාත්යංශයේ වසර දෙකක ක්රියාකාරී සැලැස්මේ එක් අදියරක් ලෙස මෙම ජාතික වැඩසටහන ක්රියාත්මක කෙරේ.
ලෝකයේ විවිධ රටවල් සිදුකළ අධ්යයන මගින් හඳුනාගත් ආකාරයට බඳ පටි පැළඳීම තුළිත් අනතුරු හානි 40%-45% සංඛ්යාවකින් අවම කරගැනීමේ හැකියාව පවතින බව සභාපතිවරයා මෙහිදී පැවසී ය. රියැදුරන්, මගීන් දැනුම්වත් කිරීම තුළින් පොදුවේ මහජනතාව ආරක්ෂිත ගමනාගමනයකට ක්රමිකව හුරු කරවීම මෙම වැඩසටහන මගින් සිදුකරනු ලබන අතර, ඒ මගින් ජීවිත, දේපළ හානි, පූර්ණ කාලීන ආබාධිත තත්ත්වයන් අවම කර ගැනීමට හැකිවන බව ද සභාපතිවරයා පැවසී ය.
ආසන බඳ පටි පැළඳීමේ කාර්යයේ දී 2025 ජූලි 01 වන දින සිට සියලුම මාර්ගවල ගමන් ගන්නා සියලු බස් රථ රියැදුරන් ආසන පටි පැළඳීම අනිවාර්ය කෙරිණ. මෙම ජාතික වැඩසටහනේ තෙවන පියවර ලෙස එළැඹෙන සැප්තැම්බර් 01 වන දින සිට අධීවේගී මාර්ගයේ ගමන් ගන්නා සියලුම වාහනවල සිටින සෑම මගියෙකුම ආසන බඳ පටි පැළඳීම අනිවාර්ය කර ඇත.
මෙම අවස්ථාවට මාර්ග සංවර්ධන අධිකාරියේ අධිවේගී මාර්ග මෙහෙයුම් නඩත්තු හා කළමනාකරණ අංශයේ නියෝජ්ය අධ්යක්ෂ ජනරාල් ආර්.ඒ.ඩී. කහටපිටිය මහතා ඇතුලු නිලධාරීහු පිරිසක් එක්ව සිටිය හ.
