කලා, සංස්කෘතික හා ආගමික ප්‍රගතිය නැංවීමට සහ ප්‍රධාන ආගම් හතරටම අයත් ව්‍යාපෘති රැසක් වෙනුවෙන් මෙවර අයවැයෙන් වැඩිමුදලක් වෙන්කර ඇතැයි බුද්ධ ශාසන ආගමික හා සංස්කෘතික කටයුතු අමාත්‍ය ආචාර්ය හිනිඳුම සුනිල් සෙනෙවි මහතා පැවසීය.
බුද්ධ ශාසක ආගමික හා සංස්කෘතික කටයුතු අමාත්‍යංශයේ වැය ශීර්ෂය පිළිබඳ අද(17) පාර්ලිමේන්තුවේ පැවති විවාදයට එක්වෙමින් අමාත්‍යවරයා මේ බැව පැවසීය.
මෙවර ජාතික තෛයිපොංගල් දින සැමරුම් ප්‍රධාන උත්සවය යාපනයේදීත්, මහාශිව රාත්‍රිය වෙනුවෙන් පවත්වන උත්සවය රත්නපුරදී පැවැත් වීමට සැලසුම් කර තිබේ. රාජ්‍ය වෙසත් උත්සවය නුවරඑළිය දිස්ත්‍රික්කයේදී පැවැත්වේ. රාජ්‍ය වෙසක් උත්සවයේ මෙවර තේමාව වන්නේ ‘භජේථ මිත්තේ කල්‍යාණේ’ නොහොත් කල්‍යාණ මිතුරන් ඇසුරු කිරීම යන්නයි.
ඒ සම්බන්ධයෙන් අදහස් දක්වමින් අමාත්‍යවරයා පැවසුවේ,
"නුවරඑළිය දිස්ත්‍ර්කයේ පන්සල් 350ක් සහ පිරිවෙන් 11 තිබෙනවා. අපි මෙවර වෙසක් උත්සවය සමරන්නේ නුවරඑළිය මලෛයිගම් ජනතාවත් එක්ක. එම ජනතාවගේ දරුවන් සමඟ වෙසක් කූඩු හදන තැනකට අපි අපේ ජනතාව ගෙනියන්න ඕන."
ශ්‍රී ලාංකික දිනය වෙනුවෙන් මෙවර අයවැයෙන් විශාල මුදලක් වෙන් කර ඇතැයිද අමාත්‍යවරයා කීය. මුස්ලිම් සහ කතෝලික ජනතාව වෙනුවෙන්ද මෙවර අයවැයෙන් මුදල් වෙන් කර තිබේ.
ඒ සම්බන්ධයෙන් අදහස් දක්වමින් අමාත්‍යවරයා මෙසේ පැවසීය.
කතෝලික මුස්ලිම් ජනතාව ආදරයෙන් වැළඳගන්නා තැනකට අපට ජාතින් අතර සමඟිය බෙදන්න පුළුවන් වෙන්න ඕන. අපි දැන්වත් හදන්න ඕන සුවපත් කිරීමේ සහ සමාව දීමේ ඇත්ත කොමිසමක්. මෙහි වගකීම බුද්ධ ශාසන සහ ආගමික කටයුතු අමාත්‍යංශයට පැවරෙනවා. සුවපත් කිරීමේ සහ සමාව දීමේ ඇත්ත කොමිසමක් දැන් අපි නිර්මාණය කළ යුතුයි
"දකුණු අප්‍රිකාවේ නෙල්සන් මැන්ඩෙලා හැදූ දේදුණු ජාතියක් (Rainbow Nation) දැන් අපිට ඇත්තටම අවශ්‍යයි".ඔහු හැමවිට ම Rainbow Nation එකක් ගැන, නැතිනම්, දේදුණු වර්ණැති ජාතියක් පිළිබද ව කතා කලා. අපි මෙවර අයවැයෙන් ශ්‍රී ලන්කන් ඩේ සඳහා මිලියන 300ක් වෙන් කරන්නේ මේ නිසයි.
