පාසල් නිවාඩුව මෙන්ම අලුත් අවුරුදු නිවාඩුව සහ යහපත් කාලගුණය මෙම සංචාරක ප්‍රවණතාව ඉතා ඉහළ අගයක් ගැනීමට හේතු වී තිබේ. නුවරඑළිය මහනගර සභාව විසින් සංවිධානය කරන ලද නුවරඑළිය වසන්ත සැණකෙළිය අංගෝපාංග රැසකින් සමන්විත වූවකි. මෙහි පැවති තුරඟ තරග, මෝටර් රථ රැළිය, මල් ප්‍රදර්ශන සහ මල් අලෙවි සැල් බොහෝ සංචාරකයන්ගේ ආකර්ශණය දිනා ගැනීමට සමත් වී තිබේ.
එමෙන්ම ග්‍රෙගරි වැව ආසන්නයේ ශ්‍රී ලංකා යුධ හමුදාව සංවිධානය කළ දේශීය ආහාරපාන අලෙවි සැල් කාගේත් සිත්ගත් අංගයක් විය. නගරය පුරා ඉදිකොට ඇති ප්‍රදර්ශන කුටි සහ අලෙවි සැල් දිවා, රාත්‍රී සංචාරකයන් හට විවෘතව ඇති අතර විනෝද උයන් සහ සංගීත සංදර්ශන සංචාරකයන්ගේ විනෝදාස්වාදය සඳහා විවෘතව තිබිණි.
නුවරඑළිය වසන්ත සැණකෙළියේ සුවිශේෂී අංගයක් වන විශේෂ මල් ප්‍රදර්ශනයක් ලබන 26 සහ 27 දෙදින තුළ නුවරඑළිය වික්ටෝරියා උද්‍යානයේ දී පැවැත්වීමට නියමිතය. ජනාධිපති ආර්යා ශිරන්ති වික්‍රමසිංහ රාජපක්ෂ මැතිණියගේ ප්‍රධානත්වයෙන් පැවැත්වෙන මේ මල් ප්‍රදර්ශනයට මධ්‍යම පළාත් ආණ්ඩුකාර ටිකිරි කොබ්බෑකඩුව සහ මධ්‍යම පළාත් ප්‍රධාන අමාත්‍ය සරත් ඒකනායක යන මහත්වරුන් ද සහභාගී වනු ඇත.
NDH/SH_dmu_nuwaraeliya
