කෘෂිකර්ම අමාත්‍ය මහින්ද අමරවීර මහතාගේ උපදෙස් පරිදි ක්‍රියාත්මක කෙරෙන “අපි වවලයි - අපි කන්නේ” වගා සංවර්ධන වැඩසටහන යටතේ මෙම ආදර්ශ කෘෂි ගම්මාන වැඩසටහන ක්‍රියාත්මක කෙරෙන අතර ඒ සඳහා ප්‍රථම ගම්මානය වශයෙන් සංවර්ධනය කෙරෙනුයේ හපුතලේ කහත්තේවෙළ ගම්මානයයි.
රුපියල් මිලියන 80ක මුදලක් මේ සඳහා කෘෂිකර්ම අමාත්‍යාංශය විසින් වැය කරනු ලබයි. ඒ අනුව කහත්තේවෙළ ගමේ පිහිටි ප්‍රධාන ඇළ මාර්ග වන යටල ඇළ හා සිරිමල්වත්ත යාය ඇළ දෙක පූර්ණ ප්‍රතිසංවර්ධනය කෙරේ. මීට අමතරව ආගමික සිද්ධස්ථාන භූමි, කෘෂි සංවර්ධන ව්‍යාපෘති ක්‍රියාත්මක කිරීම, වනසතුන්ගෙන් භෝග ආරක්ෂා කර ගැනීම සඳහා විදුලි වැට සැකසීම, කහත්තේවෙළ පලතුරු ගම්මානය පිහිටුවීම, කෘෂි යන්ත්‍රෝපකරණ ලබා දීම, ආරක්ෂිත ගෘහ හෙවත් පොලිටනල් යටතේ වගා කිරීම, මී මැසි පාලනය, කෘෂි මාර්ග සංවර්ධනය, කොස් පැළ 5000ක් හමුදා අංශවල සහයෝගය ඇති රෝපණය කිරීම, ආරක්ෂිතව ගබඩා කිරීම, අලෙවි මධ්‍යස්ථාන ආදි වැඩසටහන් රැසක් මෙහිදී ක්‍රියාත්මක කෙරේ.
කහත්තේවෙළ ගම්මානය යනු හපුතලේ ආසනයේ පිහිටි සුන්දර ගම්මානයකි. පවුල් 160ක් පමණ වෙසෙන මෙම ගම්මානයේ ප්‍රධාන ආදායම් මාර්ගය වන්නේ කෘෂිකර්මාන්තයයි. නමුත් මෙතෙක් මෙම ගම්මානයේ යටිතල පහසුකම් නැංවීම සඳහා කිසිදු පියවරක් ගෙන නොතිබුණි.
එම නිසා කෘෂිකර්ම අමාත්‍යාංශය විසින් මෙම ගම්මානය කෘෂි ව්‍යවසායකත්ව ආදර්ශ ප්‍රථම ගම්මානය වශයෙන් සංවර්ධනය කෙරෙන අතර මෙම වැඩපිළිවෙළ අඛණ්ඩව ඉදිරියට ගෙන යන ලෙසත්, ඊට අදාළ මුදල් ප්‍රතිපාදන තමන් ලබා දෙන බව අමාත්‍ය මහින්ද අමරවීර මහතා කෘෂි ගම්මාන ව්‍යවසායකත්ව සංවර්ධන වැඩසටහනේ අතිරේක ලේකම් නිමල්කා ඩයස් මහත්මියට උපදෙස් දෙනු ලැබීය.
