හුරුළු වැව ජනපදයේ ගොවීන්ට පෞද්ගලික සමාගමක් විසින් ලබා දෙන ලද බාල තත්ත්වයේ සෝයා බෝංචි බීජ නිසා ගොවීහු 400ක් පමණ පීඩාවට පත් වූහ. පීඩාවට පත් ගොවීන් අනුරාධපුර දිස්ති‍්‍රක් ලේකම් කාර්යාලය වටලා උද්ඝෝෂණයක නිරත වූ අතර ඔවුන්ගේ ඉල්ලීම වූයේ පසුගිය වසරේ යල කන්නයේ සිදු වූ වගා හානියට වන්දි ලබා දෙන ලෙසයි. මීට පෙර එම ගොවි සංවිධාන හා නිලධාරීන් සමඟ කෘෂිකර්ම අමාත්‍ය මහින්ද යාපා අබේවර්ධන මහතාගේ ප‍්‍රධානත්වයෙන් ගලෙන්බිඳුණු වැව ප‍්‍රාදේශීය ලේකම් කාර්යාලයේ පැවති සාකච්ඡාවේදී එම වන්දි ලබා දීම සඳහා අදාළ නිලධාරීන් වෙත අමාත්‍යතුමා විසින් උපදෙස් දෙන ලදී. 

ඒ අනුව 2013 වසරේ යල කන්නයේ බෝග වගාකරුවන්ට සෝයා බෝංචි බීජ ලබා දුන් පෞද්ගලික ආයතනය මඟින් මේ වන විට අදාළ වන්දි ගෙවීම් සිදු කරමින් පවතී.  වගාකරුවන් විශාල පිරිසකට මේ වන විට වන්දි ලබා දී ඇති අතර ඉතුරු ගොවීන්ට වන්දි ලබා දීමට හැකි වන සේ බීජ වෙනුවෙන් ගෙවීමට ඇති රුපියල් මිලියන 6.3ක මුදලක් අනුරාධපුර දිස්ති‍්‍රක් ලේකම් වෙත මේ වන විටත් ලබා දී ඇති බවත් එම මුදලින් ඉදිරි සතිය තුළදී වන්දි ගෙවීමට කටයුතු කරන බවත් කෘෂිකර්ම අමාත්‍යාංශය වැඩිදුරටත් සඳහන් කරයි.

NDH