ඔවුන් ශ්‍රී ලංකාවේ ප්‍රධාන බාලදක්ෂයා ලෙස පිළිගත් ජනාධිපතිතුමා සමඟ සුහද කතාබහක නිරත වූහ.
ආසියානු පැසිෆික් කලාපීය බාලදක්ෂ නායකයන්ගේ සමුළුව අග්‍රාමාත්‍ය දි.මු. ජයරත්න මහතාගේ ප්‍රධානත්වයෙන් මීගමුවේදී පසුගියදා ආරම්භ කෙරිණි. රටවල් 30ක පමණ බාලදක්ෂ නායකයන් 200කට අධික පිරිසකගේ සහභාගිත්වයෙන් පැවැත්වෙන මේ සිව්දින සමුළුව හෙට (29) දක්වා පැවැත්වේ.
ලෝක බාලදක්ෂ සංවිධානයේ ආසියා පැසිෆික් කලාපීය කාර්යාලය හා ශ්‍රී ලංකා බාලදක්ෂ සංගමයේ සංවිධානයෙන් පැවැත්වෙන මේ සමුළුවේදී පුහුණු සැසිවාර, දේශනා, වැඩමුළු හා ප්‍රායෝගික ක්‍රියාකාරකම් රැසක් සිදු කිරීමට නියමිතය.
මෙවැනි සමුළුවක් ශ්‍රී ලංකාවේ පැවැත්වෙන්නේ පළමු වතාවටයි. ත්‍රස්තවාදය නිම කිරීමෙන් පසු මෙරට ගොඩනැගී ඇති සාමකාමී වාතාවරණයත් සමඟ මෙවැනි සමුළු පැවැත්වීමට සුදුසු පරිසරයක් ශ්‍රී ලංකාවේ නිර්මාණය වී ඇති බව මේ අවස්ථාවේදී බාලදක්ෂ නායකයෝ පෙන්වා දුන්හ.
මේ හමුවට ලෝක බාලදක්ෂ සංගමයේ සභාපති සයිනම් හෑන්ග්, එහි ලේකම් ස්කොට් ටියර්, ආසියා පැසිෆික් කලාපීය සභාපති ආචාර්ය චාඔ ශෝ පෝ, ශ්‍රී ලංකා බාලදක්ෂ ප්‍රධාන කොමසාරිස් මහාචාර්ය නිමල් ද සිල්වා යන මහත්වරු එක්ව සිටියහ.
NDH/pmu_pix by Chandana Perera
