දිවුරුම් දීමේ උත්සවය ලබන සඳුදා (26) සවස නවදිල්ලි නුවර දී පැවැත්වීමට නියමිත ය. මේ අවස්ථාවට සහභාගී වන ලෙසට මේ සතිය ආරම්භයේ දී ජනාධිපති රාජපක්‍ෂ මැතිතුමාට ආරාධනා කෙරුණි.
මේ සඳහා රාජපක්‍ෂ මැතිතුමාගේ සහභාගීත්වය රාජ්‍යතාන්ත‍්‍රික මාර්ග හරහා විධිමත් ලෙසට ජනාධිපතිතුමාගේ නිල ට්විටර් ගිණුම (@PresRajapaksa) ඊයේ උදෑසන තහවුරු කර තිබේ. “ඔබගේ දිව්රුම් දීමේ උත්සවයට සහභාගී වන ලෙසට කළ ආරාධනාවට ඔබට ස්තුතියි. එයට සහභාගී වීමට මම බලාපොරොත්තුවෙන් සිටිනවා.”
මේ මස මුල පැවති මැතිවරණයේ දී ඔහුගේ පක්ෂය ලද විශිෂ්ට ජයග‍්‍රහණය වෙනුවෙන් මෝදි මහතාට ප‍්‍රථමයෙන් සුබ පැතූ ලෝක නායකයන් අතර ජනාධිපති රාජපක්‍ෂ මැතිතුමාද වේ. දූරකතන ඇමතුමෙන් පසු මෝදි මහතා ට්විටර් පණිවිඩයක් හරහා ජනාධිපති රාජපක්‍ෂ මැතිතුමාට ඒ පිළිබඳව ස්තුති කළේය. “අද උදෑසන ඔබ සමග කතා කිරීමට ලැබීම ඉතා සතුටක්. ශ‍්‍රී ලංකාව හා ඉන්දියාව අතර ශක්තිමත් සබඳතාවක් මම බලාපොරොත්තු වෙනවා.”
මෝදි මහතාට ලබා දුන් දූරකතන ඇමතුමේ දී ජනාධිපති රාජපක්‍ෂ මැතිතුමා දෙරට අතර සබඳතා තවදුරටත් ශක්තිමත් කර ගැනීමට නව පාලනය සමඟ ක‍්‍රියා කිරීමට තම රජය බලාපොරොත්තු වන බව ද සඳහන් කළේය.
HC/NP_PS&IMU
