ඇතැම් වංචනික පිරිස් ජනාධිපති ගෝඨාභය රාජපක්ෂ මැතිතුමා සමග සමීප සබඳතා පවතින බව අඟවමින් මෙම කූට ව්‍යාපාරයේ නිරත වන බවට පොලීසියට තොරතුරු ලැබී තිබෙන අතර ඊට සම්බන්ධ දෙදෙනෙකු කොළඹ අපරාධ කොට්ඨාසය විසින් අද (09) පෙරවරුවේ අත්අඩංගුවට ගන්නා ලදී.

අත්අඩංගුවට ගෙන ඇති ප්‍රධාන සැකකරු රාජාංගනය, යාය 08 පදිංචි වයස අවුරුදු 47ක් වන නිහාල් දසනායක නමැත්තෙකි. අනෙක් පුද්ගලයා සෙවනගල, සමඟිපුර පදිංචි නුවන් ජයකොඩි යන අයයි.

දියණියට ගුරු පත්වීමක් ලබාදෙන බව පවසා ප්‍රධාන සැකකරු විසින් තඹුත්තේගම ප්‍රදේශයේ පදිංචි කාන්තාවකගෙන් රුපියල් ලක්ෂ එක හමාරක මුදලක් ඉල්ලා තිබේ. උතුරු මැද පළාත් ප්‍රධාන ලේකම්වරයා විසින් නිකුත් කළ බවට ඇඟවෙන ව්‍යාජ ලිපියක් ද පත්වීමට අදාළව සකස් කර ඇත. මේ අතර අධ්‍යාපන අමාත්‍යාංශයේ නිලධාරියෙකු බව සඳහන් කරමින් නුවන් ජයකොඩි නැමැත්තා ලවා අදාළ කාන්තාවට දුරකථන ඇමතුමක් ද දී තිබේ.

අනතුරුව මුදල් රැගෙන කොළඹ ඉසුරුපාය ඉදිරිපිටට පැමිණෙන ලෙස දන්වා ඇති අතර, සැකකරුවන් දෙදෙනා අදාළ කාන්තාවන්ගෙන් මුදල් ලබා ගන්නා අවස්ථාවේදීම අත්අඩංගුවට ගෙන ඇත.

මේ පිළිබඳ වැඩිදුර පරික්ෂන කොළඹ අපරාධ කොට්ඨාසය විසින් මෙහෙයවනු ලැබේ. මෙවන් සිදුවීම් පිළිබඳ තොරතුරු ඇත්නම් වහාම දැනුම් දෙන ලෙස බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා ජනතාවට දැනුම් දෙයි. ඕනෑම අවස්ථාවක 071- 8591017 දුරකථන අංකය ඔස්සේ ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා සම්බන්ධ කර ගැනීමෙන් හෝ 0112662323 හෝ 0718591727 දුරකථන අංක ඔස්සේ කොළඹ අපරාධ කොට්ඨාසයේ පොලිස් අධිකාරි ජී.ජේ නන්දන මහතා සම්බන්ධ කර ගැනීමෙන් තොරතුරු ලබා දිය හැකිය.

ජනාධිපති ගෝඨාභය රාජපක්ෂ මැතිතුමාගේ ස්ථීරසාර පිළිවෙත වනුයේ සෑමවිටම පිළිගත් ක්‍රමවේදයට හා පටිපාටියට අනුව වැඩකිරීමටයි. රජයේ ආයතනවලට රැකියා ලබාදීම සිදු කරන්නේ ද එම පිළිවෙත අනුවය.
එබැවින් මෙවැනි වංචනික පුද්ගලයන්ට නොරැවටෙන්නැයි ජනාධිපති කාර්යාලය ද ජනතාවට කාරුණිකව දන්ව සිටින අතර එවන් පුද්ගලයන්ට එරෙහිව දැඩි නීතිමය ක්‍රියාමාර්ග ගැනීමට අපේක්ෂ කරයි.