ඒ මහතා මේ බව ප්‍රකාශ කළේ අද (10) ජනමාධ්‍ය හා පාර්ලිමේන්තු කටයුතු පිළිබඳ අමාත්‍යංශයේ පැවැති ප්‍රවෘත්ති සාකච්ඡාවකට එක්වෙමිනි.
"පසුගිය ආණ්ඩු සමයේ දී ආරම්භ කළ සංවර්ධන ව්‍යාපෘති අතරමග නතර කිරීමේ පිළිවෙතක් නව රජය අනුගමනය කරන බවට විපක්ෂය විසින් චෝදනා කරනු ලැබූවද එවැනි චෝදනාවල කිසිඳු සත්‍යතාවයක් නොවේ. නමුත් සමහර ව්‍යාපෘති සම්බන්ධයෙන් නැවත සොයා බැලිය යුතු තත්ත්වයක් උදා වී තිබේ. සමහර සංවර්ධන ව්‍යාපෘතින් බෝඩ් ලෑල්ලට පමණක් සීමා වූ ඒවායි. එම ව්‍යාපෘතින් පිළිබඳ ව ද සොයා බලා එම ව්‍යාපෘති ක්‍රියාත්මක කිරීමට ඉදිරියේ දී කටයුතු කරනවා".
යහපාලනය සඳහා ජනවරමක් ලබාගත් වත්මන් ආණ්ඩුව මහජනතාව වෙනුවෙන් සාධාරණයක් ඉටු කිරීමට බලාපොරොත්තු වන අතර ම දින 100 වැඩපිළිවෙළ ක්‍රියාත්මක කිරීමට ද බැඳී සිටින බවත් ප්‍රකාශ කළේය.
වර්තමාන ආණ්ඩුව ඇමෙරිකානු ගැතිකමින් කටයුතු කරන බවට විපක්ෂයෙන් චෝදනාවන් නැගෙනවා. නමුත් පසුගිය රජය විසින් ඇමෙරිකාවේ ශ්‍රී ලංකාව කෙරෙහි පවතින ආකල්ප තුරන් කිරීම සඳහා රුපියල් කෝටි 15ක් සමාගම් පහක් වෙනුවෙන් ගෙවීමට පවා කටයුතු කර තිබෙනවා. මේ හරහා පැහැදිලි වෙනවා ඔවුන් දෙබිඩි පිළිවෙතක් අනුගමනය කළ බව. මඩකලපුවේ සහ යාපනයේ ඉදිවන මන්දිර සම්බන්ධයෙන් තොරතුරු අනාවරණය වීමෙන් අනතුරුව චෝදනාවලින් නිදහස්වීම සඳහා අදාළ පර්ශවයන් විවිධ නිවේදන නිකුත් කරමින් බොළඳ උත්සාහයක දැන් නිරත වෙනවා.
එසේම 800%ක් තරම් අති විශාල ලාභයක් ඖෂධ හරහා මෙතෙක් ලබාගත් ක්‍රමය නව ඖෂධ පනත හරහා ඖෂධ සමාගම් වෙත අහිමිවන බව පෙන්වා දුන් අමාත්‍යවරයා ප්‍රමිතයෙන් යුතු ඖෂධ ඉතා සහන මිලකට ඉදිරියේ දී ලබාගත හැකි බවත් වැඩිදුරටත් පෙන්වා දුන්නේය.
DB
