ඉලක්කයට, ප්‍රමිතියට සේවා සපයන ඉදිකිරීම්කරුවන්ට රජයේ ප්‍රමුඛතාවය ලබා දෙන බවත් දේශපාලන බලපෑම් නොමැතිව ස්වාධීනව සේවා සැපයීමේ අවස්ථාව ලබා දෙන බවත් රජය විශාලත ම ආයෝජකයා ලෙස ඉදිකිරීම් ක්ෂේත්‍රය නැංවීමට මෙන් ම වෘත්තීය මට්ටම උසස් කිරීමට සහාය දෙන බවත් ප්‍රවාහන, මහාමාර්ග, වරාය හා සිවිල් ගුවන් සේවා අමාත්‍ය බිමල් රත්නායක මහතා පවසයි.
අමාත්‍යවරයා මේ බව සඳහන් කළේ ඉදිකිරීම් ක්ෂේත්‍රයට සම්බන්ධ කොන්ත්‍රාත්කරුවන් සහ සමාගම් නියෝජිතයින් දැනුවත් කිරීමේ හමුවකට පසුගියදා එක් වෙමිනි.
2025 වසර වෙනුවෙන් ආරම්භ කිරීමට යෝජිත සංවර්ධන ව්‍යාපෘති පිළිබඳ ව අමාත්‍යවරයා කොන්ත්‍රාත්කරුවන්සමග සාකච්ඡා කළ අතර දූෂණයට එරෙහිව ජනතාව ලබාදී ඇති ජනවරම ආරක්ෂා කරමින් රජයේ මුදල් විනිවිද භාවයෙන් යුතුව වැය කරන ලෙස අමාත්‍යවරයා එහිදී පවසා ඇත.
එසේම මහා මාර්ග සංවර්ධනය, අධිවේගී මාර්ග ඉතිරි කොටස් නිම කිරීම, පාලම්, ව්‍යාපෘති, ආලෝක සංඥා පද්ධති නවීකරණය, ග්‍රාමීය මාර්ග සංවර්ධනය හා පුනරුත්ථාපනය, බහුවිධ ප්‍රවාහන පර්යන්ත ව්‍යාපෘති ඇතුලු අංශ රැසක සංවර්ධන කටයුතු පිළිබඳ ව මෙහි දී සාකච්ඡා කර තිබේ.
එහිදී වැඩිදුරටත් අදහස් දැක්වූ අමාත්‍යවරයා
''මහජන සහභාගිත්වය සහිතව සංවර්ධන කටයුතු පෙරට ගෙන යාමෙන් ජනතාවට අවශ්‍ය උපරිම සේවය ලබාදෙන්න පුළුවන්. ප්‍රාදේශීය සම්බන්ධීකරණ කමිටුවල සහාය ලබාගෙන අවශ්‍යතාව අනුව ජනතාවට උපරිම ප්‍රතිලාභ ලැබෙන, දූෂණයෙන් තොර ව්‍යාපෘති ක්‍රියාත්මක කරන්න. පසුගිය ආණ්ඩු කළා වගේ වත්මන් රජය ව්‍යාපාර කරන්න යන්නේ නැහැ. අපි ජන වරමට යටත් රජයක්. අනෙක් සියලු දෙනාත් ජනවරමට යටත්. ජනතා මුදල් විනිවිද භාවයෙන් යුතුව වැය කිරීමට කටයුතු කළ යුතුයි. දීර්ඝ කාලයක් තිස්සේ අත්හැර දමා තිබූ උතුරු පළාතේ සංවර්ධනය සඳහා රජය ප්‍රමුඛතාවය ලබා දෙනවා. එම ප්‍රදේශයේ ග්‍රාමීය මාර්ග මහා මාර්ග සහ පාලම් ඇතුළු යටිතල පහසුකම් සංවර්ධනය වෙනුවෙන් කැපවෙනවා. එසේම රටේ අනෙකුත් පළාත්වල ද මහා මාර්ග, ආදී යටිතල පහසුකම් සංවර්ධනය වෙනුවෙන් ඉදිකිරීම් කරුවන්ගේ සහාය අවශ්‍ය වෙනවා '' යැයි ද පැවසීය.
එසේම ඉදිරි පස් වසරක සංවර්ධන සැලැස්ම යථාර්ථයක් බවට පත්කර ගැනීම සඳහා අමාත්‍යාංශය සහ මාර්ග සංවර්ධන අධිකාරිය සමඟ එක්ව කටයුතු කරන මෙන් අමාත්‍යවරයා මෙම අවස්ථාවට සහභාගී වූ නිලධාරීන්ගෙන් සහ සමාගම් නියෝජිතයින්ගේ ඉල්ලා සිටියේ ය.
මෙම අවස්ථාවට ප්‍රවාහන හා මහා මාර්ග නියෝජ්‍ය අමාත්‍ය වෛද්‍ය ප්‍රසන්න ගුණසේන මහතා සහ ප්‍රවාහන මහා මාර්ග, වරාය සහ සිවිල් ගුවන් සේවා අමාත්‍යාංශයට අදාළ ආයතන නිලධාරීන් පිරිසක් සහභාගී විය.
