ලොව අධික ලාභ උපයන ව්‍යාපාරයක් මෙන්ම ජාවාරමක් ද බවට වර්තමානයේ පත්ව ඇති ඖෂධ ක්ෂේත්‍රයේ ගැටලු, දෝෂ නිරාකරණයට සහ නිවැරදි කිරීම වෙනුවෙන් පෙනී සිටින සියලුම සේවකයින් ධෛර්මත් කිරිමටත්, ඔවුන්ගේ ආරක්ෂාව වෙනුවෙනුත් රජය පෙනී සිටින බවත්, ජාවාරම්කරුවන්ගේ හෝ එම කණ්ඩායම්වල අභිලාෂයන් වෙනුවෙන් අමාත්‍යාංශය හෝ රජය කටයුතු නොකරන බවත් සෞඛ්‍ය හා ජනමාධ්‍ය අමාත්‍යවරයා පැවසීය.
සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා මෙම අදහස් ප්‍රකාශ කරන ලද්දේ පසුගියදා කොළඹ - 02 පිහිටි ජාතික ඖෂධ නියාමන අධිකාරියේ (NMRA) හදිසි නිරීක්ෂණයකට එක්වෙමිනි.
ජාතික ඖෂධ නියාමන අධිකාරිය රට තුළ පවතින ඖෂධීය නිෂ්පාදනවල ආරක්ෂාව, ගුණාත්මකභාවය සහ කාර්යක්ෂමතාව පිළිබඳ අදාළ ප්‍රමිතීන් සහතික කිරීම මගින් මහජන සෞඛ්‍යය ආරක්ෂා කිරීම සහ වැඩිදියුණු කිරීම සඳහා ප්‍රමුඛ කාර්යභාරයක් ඉටු කරනු ලබන අතර, ඖෂධ, සෞඛ්‍ය ආරක්ෂණ නිෂ්පාදන සහ රූපලාවන්‍ය ද්‍රව්‍යවල ආරක්ෂාව, ගුණාත්මකභාවය සහ කාර්යක්ෂමතාව සහතික කිරීම සඳහා නියාමනය, අධීක්ෂණය සහ සාක්ෂි මත පදනම් වූ තීරණ ලබාදීම ද සිදු කරනු ලබන ආයතනයකි.
මෙහිදී ජාතික ඖෂධ නියාමන අධිකාරියේ සභාපති විශේෂඥ වෛද්‍ය ආනන්ද විඡේවික්‍රම මහතා ඇතුලු නිලධාරින් සමග අධිකාරියේ වත්මන් ක්‍රියාකාරීත්වය, පාලන ක්ෂේත්‍රය, කාර්ය මණ්ඩල ගැටලු, ඖෂධ මිල නියාමනය, ඖෂධ ලියාපදිංචිය, නව අයදුම්පත් කැඳවීම වැනි ක්ෂේත්‍ර පිළිබඳව අමාත්‍යවරයා දීර්ඝ ලෙස සාකච්ඡාවක ද නියැලෙන ලදි.
මෙහිදී වැඩිදුරටත් අදහස් දැක්වූ අමාත්‍යවරයා මහාචාර්ය සේනක බිබිලේ මහතා මෙරටට ඖෂධ ප්‍රතිපත්තියක් හඳුන්වාදීමට කැපවෙමින් ඖෂධ සමාගම් සමග සටන් කළ බව ද, අවසානයේ එනිසාම ඝාතනයට ලක් වූ පුද්ගලයෙක් වූ බව ද පැවසීය. අද වන විට ඝාතනයන් සිදු නොවූවද වෙනත් සූක්ෂම ක්‍රියා මගින් සිය අභිලාෂයන් මුදුන්පත් කර ගැනීම සඳහා ජාවාරම්කරුවන් කටයුතු කරන බැවින් රජය ගෙනයනු ලබන වැඩපිළිවෙළ කඩාකප්පල් කිරීමට උත්සාහ දරන පිරිස් පිළිබඳ මනා අවබෝධයෙන්, කටයුතු කළ යුතු බව ද පැවසීය. එමෙන්ම බොහෝ විට මෙම ක්ෂේත්‍රයට සම්බන්ධ තොරතරු මාධ්‍ය මගින් වාර්තා කරනු ලබන්නේ අහිංසක ප්‍රාර්ථනාවන්ගෙන් නොව ජාවාරම්වල දිගුවක් ලෙස විය හැකි බව ද අමාත්‍යවරයා ප්‍රකාශ කළේය.
ගුණාත්මකභාවය, තත්ත්වය, මිල ඇතුලු ඖෂධ සම්බන්ධ සියලු කටයුතුවල දී ගැටලු මතු වුවහොත් කණ්ඩායමක් ලෙස සියලු දෙනා ඊට වගකිව යුතු බව පැවසූ සෞඛ්‍ය හා ජනමාධ්‍ය අමාත්‍යවරයා, වගකීමකින් යුතුව කටයුතු කිරීමේ වැදගත්කම ද අවධාරණය කළේය.
මෙහිදී තවදුරටත් අදහස් දැක් වූ අමාත්‍යවරයා දේශපාලනඥයින් තමන්ගේ ආසනයට කුමන හෝ දෙයක් සිදු කිරීමට අවශ්‍යයි යන සිතුවිල්ලෙන් කටයුතු කරන බවත්, බන්ධනාගාරයක් හෝ තම ආසනයට ලබාගැනීම ඔවුනගේ කැමැත්ත බව ද එලෙස දේශපාලනඥයින්ගේ සිතැගිවලට අනුව කටයුතු කිරීමට ඉඩ නොතබා සෞඛ්‍ය ක්ෂේත්‍රයේ ඉදිරි පස් වසර ජාතික අවශ්‍යතාවයට අනුව සැළසුම්, ඉලක්ක සහ මනා ඉදිරි දැක්මකින් යුතුව ප්‍රධාන අංශ කිහිපයක් මුලික කර මෙහෙයවීමට සහ විධිමත් කිරීමට බලාපොරොත්තු වන බව ද පැවසීය. ප්‍රාථමික සෞඛ්‍ය සේවාව ශක්තිමත් කිරීම, ද්විතීයික සහ තෘතියීක සෞඛ්‍ය සේවාවන් සංවර්ධනය කිරීම, නියාමනය කරන ලද මිලක් සහිතව ගුණාත්මක, තත්ත්ව සහතික කළ ඖෂධ අඛණ්ඩ සැපයුම, සංචාරක සෞඛ්‍ය නැංවීම, සියලු ක්ෂේත්‍ර ඒකාබද්ධව ළමා මන්දපෝෂණය ඇතුලු පෝෂණ ගැටලුව විසඳීමට කටයුතු කිරීම එම අංශ වන බව ද අමාත්‍යවරයා මෙහිදී පෙන්වා දෙන ලදි.
ජාතික ඖෂධ නියාමන අධිකාරිය සතුව චර්යාධර්ම පද්ධතියක් වන බවත්, ඊට අනුගත වෙමින් ජාතික ඖෂධ නියාමන අධිකාරියේ කාර්යයේ ගුණාත්මකභාවය සහ තීරණ ගැනීමේ ගුණාත්මකභාවය සහතික කිරීම සඳහා අධ්‍යක්ෂ මණ්ඩල සාමාජිකයින් සහ කාර්ය මණ්ඩලය ඔවුන්ගේ අඛණ්ඩතාව, අපක්ෂපාතීත්වය සහ ස්වාධීනත්වය අඛණ්ඩව පවත්වාගෙන යාම සහ වැඩිදියුණු කිරීම, සහතික කිරීම කළ යුතු බව ද අමාත්‍යරයා මෙම සාකච්ඡාවේ දී දැඩිව අවධාරණය කළේය.
මෙම අවස්ථාවට සෞඛ්‍ය හා ජනමාධ්‍ය අමාත්‍යාංශයේ නියෝජ්‍ය අමාත්‍ය වෛද්‍ය හංසක විඡේමුණි, ජාතික ඖෂධ නියාමන අධිකාරියේ සභාපති විශේෂඥ වෛද්‍ය ආනන්ද විඡේවික්‍රම, අධ්‍යක්ෂ නියාමන අර්ජුන පත්මපෙරුම, අධ්‍යක්ෂ මණ්ඩල නියෝජිතයින් ඇතුලු ජාතික ඖෂධ නියාමන අධිකාරියේ කාර්ය මණ්ඩලය එක්ව සිටියහ.
