රාජ්ය අයවැය සකස් කිරීමේදී ස්ත්රී–පුරුෂ සමාජභාවය පදනම් කරගත් විශ්ලේෂණය (Gender-Responsive Budgeting) සඳහා ඇති අවශ්යතාවය සහ ඒ හා සම්බන්ධ වත්මන් අභියෝග පිළිබඳව සාකච්ඡා කිරීම සඳහා පාර්ලිමේන්තු මන්ත්රීවරියන්ගේ සංසදයේ රැස්වීමක් පසුගියදා පාර්ලිමේන්තුවේදී පැවැත්විණි.
අයවැය ක්රියාවලියේදී කාන්තාවන්ගේ ආර්ථික දායකත්වය නිසි ලෙස ගණනය කිරීම සඳහා දැනට පවතින දත්ත හා දර්ශකවල හිඟකම මෙහිදී ප්රධාන අභියෝගයක් ලෙස අවධාරණය කෙරිණි. ඉන්දියාව වැනි රටවල් අනුගමනය කරන ක්රමවේද පිළිබඳ උදාහරණ දක්වමින් මෙරට පද්ධතිමය හා තාක්ෂණික අඩුපාඩු හඳුනාගැනීමේ අවශ්යතාවද මෙහිදී මතු විය.
එමෙන්ම ව්යාපෘති වාර්තාකරණයේදී ස්ත්රී–පුරුෂ සමාජභාවය අනුව දත්ත වෙන් කර හඳුනාගැනීමේ අවශ්යතාවත්, ඒ සඳහා මාර්ගගත දත්ත පද්ධති ශක්තිමත් කිරීමේ අවශ්යතාවත් අවධාරණය කෙරිණි. අමාත්යාංශ මට්ටමින් ව්යාපෘති ආරම්භයේදීම නිවැරදි දත්ත හඳුනාගෙන ක්රියාත්මක කිරීම මඟින් විශ්ලේෂණය හා ප්රතිඵල මැනීම වඩාත් පහසු වන බවද මෙහිදී පෙන්වා දෙන ලදී.
සාම්ප්රදායික හා කාලය වැයවන ක්රමවේදයන් වෙනුවට විධිමත් මාර්ගගත පද්ධති සහ දත්ත මත පදනම් වූ විශ්ලේෂණ මෙවලම් කරා යොමු වීමේ අවශ්යතාවද මෙහිදී අවධාරණය විය. ස්ත්රී–පුරුෂ සමාජභාවීය ප්රතිචාරාත්මක අයවැයකරණය ශ්රී ලංකාවේ රාජ්ය මූල්ය ප්රතිපත්තියට ඒකාබද්ධ කිරීමේ වත්මන් ප්රගතිය සහ අභියෝග ද සවිස්තරාත්මකව සාකච්ඡා කෙරිණි.
එසේම එම අයවැයකරණය නාමික ප්රතිශතයන්ට සීමා නොවී සත්ය ප්රායෝගික බලපෑමක් ඇති කිරීම සඳහා විධිමත් රාමුවක් සහ ශක්තිමත් දත්ත පද්ධතියක් ස්ථාපිත කිරීමේ අවශ්යතාවද මෙහිදී අවධාරණය කෙරිණි.
මෙම රැස්වීම සංසදයේ සභාපතිනී, කාන්තා හා ළමා කටයුතු අමාත්ය සරෝජා සාවිත්රි පෝල්රාජ් මහත්මියගේ ප්රධානත්වයෙන් පැවැත්වුණු අතර, අග්රාමාත්ය ආචාර්ය හරිනි අමරසූරිය මහත්මිය ද සහභාගී වූවාය.
