අමාත්‍යවරයා මේ බව පැවසුවේ ව්‍යාපෘති 50,000 ක්‍රීයාකාරි සැලැස්ම පිළිබද පසුගියදා (14) සිය අමාත්‍යාංශ ශ්‍රවණාගාරයේ දී පැවති විශේෂ සාකච්ඡාවට සහභාගී වෙමිනි.
දිවයිනෙහි සෑම ප්‍රාදේශීය ලේකම් කොට්ඨාසයක්ම ආවරණය වන පරිද්දෙන් සමෘද්ධි ප්‍රතිලාභීන් හරහා නව ජීවනෝපාය ව්‍යාපෘති 50,000 ක් කඩිනමින් ආරම්භ කිරීමට අමාත්‍යවරයා සමෘද්ධි සංවර්ධන දෙපාර්තමේන්තුව වෙත උපදෙස් දී ඇත.
සත්ත්ව පාලනය, ධීවර, කෘෂිකර්මාන්ත සේම කර්මාන්ත ක්ෂේත්‍රයේ නිෂ්පාදන හා අළෙවි කටයුතු මෙම ජීවනෝපාය ව්‍යාපෘති තුළින් ආවරණය වේ. අපනයන ආදායම වැඩි කළ හැක්කේ අගයදාමය වැඩි කිරීම තුළින් පමණක් බව පැවසූ අමාත්‍යවරයා ඒ සදහා නිෂ්පාදනය වැඩි කරමින් රටේ ආදායම් උත්පාදනය වැඩි කළ යුතු බව කළ යුතු බව ද පැවසීය.
ව්‍යාපෘති 50,000 කඩිනමින් ජනතාව අතරට ගෙන යාම සදහා අමාත්‍යාංශය සතුව 28,500 ක පමණ සේවක බලකායක් සිටින බවත් විවිධ අමාත්‍යාංශ යටතේ ඇති ආයතන හරහා මෙම වැඩපිළිවෙල ඉතා සාර්ථකව ඉටු කළ හැකි බවත් සදහන් කළ අමාත්‍යවරයා සියළු සහාය සේවා රාජ්‍ය ආයතනයන්හි අදහස්, යොජනා හා නිර්මාණශීලි හැකියාවන් මෙම වැඩපිළිවෙලට දායක විය යුතු යැයි පැවසීය.
තාක්ෂණය, පුහුණුව, තත්ත්ව කළමණාකරනය සහ සම්පත් දායකත්වය නිසි ලෙසින් ඒකරාශී කර ගනිමින් රජයට සැලකිය යුතු වැඩ කොටසක් ඉදිරි කාලය තුළදි ක්‍රියාත්මක කළ යුතුව තිබෙනවා. රාජ්‍ය සේවයේ වැටුප් ලබන අතරතුරදී ඔබ විසින් අප අමාත්‍යාංශය වෙත විශේෂ ව්‍යාපෘති වාර්තා ලබා දෙන්නේ නම් ඊට ප්‍රසාද දීමනාවක් ලබා දීමටද අමාත්‍යවරයා මෙහිදි අදහස් කළා.
අපනයන ගම්මාන 5000 වැඩසටහන සේම දිවයින පුරා කෘෂි අධි කලාප 23ක් ඇති කිරීමේ වැඩකටයුතු සාර්ථක ලෙස ඉදිරියට ඇදෙයි. සාම්ප්‍රදායික රාජ්‍ය සේවකයෙකුගේ මානසිකත්වයෙන් මිදී ක්‍රියාශිලී හා නිර්මාණාත්මක ජනතා හිතවාදී රාජ්‍ය සේවකයෙකු වී සමස්ත සමෘද්ධි ප්‍රතිලාභීන් දරිද්‍රතාවයෙන් මුදවා ගත යුතු බවද අමාත්‍යවරයා සදහන් කළේය.
සමෘද්ධි සංවර්ධන දෙපාර්තමේන්තුව විසින් පිහිටුවා ඇති කුඩා කණ්ඩායම් 494,914 ක්, ප්‍රජා මූල සංවිධාන 30,211 ක්, ප්‍රජා මූල බැංකු 1,073 ක්, ප්‍රජා මූල බැංකු සමිති 331ක්, ව්‍යවසායකයින් 25000 ක්, ප්‍රාදේශීය සංවිධාන 331ක් සේම දිස්ත්‍රික් සංවිධාන 25 ක් ක්‍රියාත්මක බව මෙහිදි අමාත්‍යවරයා කීය. දිවයිනෙහි පිහිටි සමෘද්ධි බැංකු වල සාමාජිකයින්ගේ සංඛ්‍යාව 3,937,043 ක් වන බවද අමාත්‍යවරයා පැවසීය.
සමෘද්ධි සංවර්ධන දෙපාර්තමේන්තුව, කෘෂිකර්ම දෙපාර්තමේන්තුව, සත්ත්ව නිෂ්පාදන හා සෞඛ්‍ය සේවා දෙපාර්තමේන්තුව, ආයුර්වේද දෙපාර්තමේන්තුව, කාර්මික සංවර්ධන මණ්ඩලය, අපනයන සංවර්ධන මණ්ඩලය, ප්‍රාථමික කර්මාන්ත අමාත්‍යාංශය, අපනයන කෘෂිකර්ම දෙපාර්තමේන්තුව, විද්‍යා හා තාක්ෂණ අමාත්‍යාංශය, NERD ආයතනය, මැණික් හා ස්වර්ණාභරණ අධිකාරිය, ජල ජීවී වගා සංවර්ධන අධිකාරිය, ජාතික මෝස්තර මධ්‍යස්ථානය, ජනකලා කේන්ද්‍රය, ශ්‍රී ලංකා වාණිජ දෙපාර්තමේන්තුව, කර්මාන්ත අමාත්‍යාංශය, පේෂ කර්ම දෙපාර්තමේන්තුව, ධීවර හා ජලජ සම්පත් දෙපාර්තමේන්තුව, ජාතික උද්භිද උද්‍යාන දෙපාර්තමේන්තුව, පොල් සංවර්ධන මණ්ඩලය, පොල් වගා කිරීමේ මණ්ඩලය, කප්රුක යන ආයතනයන්හි ප්‍රධානීන් මෙම විශේෂ සාකච්ඡාවට එක්වීය.
