තාක්ෂණවේදය විෂය ධාරාවන් සඳහා ඇතුළත් වන්නා වූ ඉංජිනේරු තාක්ෂණවේදය සහ ජෛව පද්ධති තාක්ෂණවේදය යන විෂයන්ගේ ඉගැන්වීම් කටයුතු සහ ප‍්‍රායෝගික ක‍්‍රියාකාරකම් සඳහා මෙම තාක්ෂණ පීඨ ඉදිකරනු ලැබේ.
මහින්දෝදය තාක්ෂණ පීඨ ගොඩනැගිල්ලක් ඉදිකිරීම සඳහා වැයකරනු ලබන මුදල රුපියල් මිලියන 25කි. අවශ්‍ය උපකරණ මිලදී ගැනීමට තවත් රුපියල් මිලියන 40ක් වැය කරනු ලැබේ. ඒ අනුව එක් මහින්දෝදය තාක්ෂණ පීඨයක් සඳහා වැය කරනු ලබන මුළු මුදල රුපියල් මිලියන 65ක් වේ. පළමු වටය යටතේ රටපුරා තාක්ෂණ පීඨ 250ක් ඉදිකිරීමට සැලසුම් කර ඇති අතර එහි ඉදිකිරීම් කටයුතු මාස 6ක කාලයක් ඇතුළත අවසන් කෙරේ.
අධ්‍යාපන පොදු සහතික පත්‍ර උසස් පෙළ සඳහා තාක්ෂණවේදය විෂය ධාරාව 2013 වසරේ සිට ආරම්භ විය.
මෙම විෂය ධාරාව යටතේ උසස් පෙළ සමත්වන සිසුන් සඳහා අධ්‍යාපනය ලැබීමට රජයේ විශ්වවිද්‍යාලයන්හි විද්‍යා පීඨයන්ට අවශ්‍ය පහසුකම් 2016 වසර වන විට ලබාදීමට සැලසුම් කර ඇත. මීට අමතරව යෞවන කටයුතු සහ නිපුණතා සංවර්ධන අමාත්‍යංශය යටතේ පවතින කාර්මික තාක්ෂණික ආයතනයන්හි පුහුණුව ලැබීමටද මෙම සිසුන්ට අවශ්‍ය පහසුකම් ලබාදීමටද නියමිතය. අධ්‍යාපන අමාත්‍යංශය, උසස් අධ්‍යාපන අමාත්‍යංශය සහ යෞවන කටයුතු සහ නිපුණතා සංවර්ධන අමාත්‍යංශය එක්ව මෙම ව්‍යාපෘතිය ක‍්‍රියාත්මක කරනු ලබයි.
ගම්පහ බණ්ඩාරනායක විද්‍යාලයේ පැවති මුල්ගල් තැබීමේ අවස්ථාවට දේශීය වෛද්‍ය නියෝජ්‍ය අමාත්‍ය පණ්ඩු බණ්ඩාරනායක, පා.ම. ජේ.ආර්.පී. සූරියප්පෙරුම, බස්නාහිර පළාත් සභාවේ සභාපති සුනිල් විජේරත්න, පළාත් සභා මන්ත‍්‍රී සුසාර දිනාල්, ගම්පහ නගරාධිපති එරංග සේනානායක, බණ්ඩාරනායක විද්‍යාලයේ විදුහල්පති ඇතුළු ආචාර්ය මණ්ඩලය සහ සිසුහු එක්ව සිටියහ.
DB/KT
