කෘෂිකර්ම අමාත්‍ය මහින්ද යාපා අබේවර්ධන මහතාගේ උපදෙස් පරිදි කෘෂිකර්ම අමාත්‍යාංශයේ මූලිකත්වයෙන් මෙය සිදු කෙරේ. දේශීය බීජ පිළිබඳ ජනතාව තුළ යහපත් ආකල්ප ඇති කිරීම සඳහා උක්ත වැඩසටහන පිළිබඳ විද්‍යුත් හා මුද්‍රිත මාධ්‍ය ආවරණය වන පරිදි සතියක පමණ කාලයක සිට පූර්ව දැනුවත් කිරීම් සිදු කිරීමට පියවර ගෙන ඇති අතර බැනර්, පොස්ටර්, ස්ටිකර්ස්, අත්පත්‍රිකා හා ශබ්ද විකාශන මඟින් සෑම දිස්ත්‍රික්කයක්ම ආවරණය වන පරිදි මහජනතාව වෙත දැනුම බෙදා හැරීමට වැඩසටහන් ද ආරම්භ කර ඇත.
ජනාධිපතිතුමාගේ මහින්ද චින්තන සංකල්පයට අනුව දේශීය බීජ භාවිතය මෙරට තුළ ව්‍යාප්ත කිරීමට හා උසස් තත්ත්වයේ බීජ ගොවීන් වෙත පහසුවෙන් ලබා ගැනීමේ හැකියාව වර්ධනය කිරීමට මෙම වැඩසටහන් පෙළ විශාල දායකත්වයක් ලබා දෙනු ඇතැයි ද කෘෂිකර්ම අමාත්‍යාංශයේ බලාපොරොත්තුවයි.
බීජ අලෙවි ප්රවර්ධන සතියට සමගාමීව වැඩසටහන් රැසක් දීප ව්‍යාප්ත මට්ටමින් ආරම්භ කිරීමට කටයුතු මේ වන විටත් සුදානම් කර ඇත. දිවයිනේ සෑම දිස්ත්‍රික්කයක්ම ආවරණය වන පරිදි ගොවීන් හා මහජනයා වැඩිපුර ගැවසෙන ස්ථාන ඉලක්ක කර ගනිමින් ජංගම රථ මඟින් බීජ අලෙවි කිරීම හා අලෙවි ප්රවර්ධන කටයුතු සඳහා තාක්ෂණ නිලධාරීන්ගේ සහය මහජනතාව වෙත ලබා දීමට කටයුතු යොදා ඇත.
මීට අමතරව ලක් කෘෂි අලෙවි නියෝජිතයන් 1000ක් අලුතින් බඳවා ගැනීමටත් ඔවුන්ට අවශ්‍ය උසස් තත්ත්වයේ බීජ තොග වශයෙන් ලබා දීමටත් කටයුතු යොදා ඇති අතර, ඉදිරි වර්ෂය සඳහා බීජ හා රෝපණ ද්‍ර‍ව්‍ය ඇනවුම් ලබා ගැනීමට අවශ්‍ය පියවර ගැනීමටත් කටයුතු සුදානම් කර ඇතැයි ද කෘෂිකර්ම අමාත්‍යාංශය වැඩිදුරටත් පැවසීය.
NDH
