ලබන 21 වන දිනෙන් අවසන් වන මේ ප්‍රදර්ශනය නැරඹීම සඳහා ලබන 19 හා 20 යන සතිඅන්ත දින දෙකෙහි ලක්ෂ ගණනකින් ප්‍රදර්ශන භූමිය පිරී යනු ඇතැයි තමා විශ්වාස කරන බව ද ඔහු අවධාරණය කළේය.
ප්‍රදර්ශනයේ ආරම්භක දිනයේ 2000ක් වැනි සුළු පිරිසක් ප්‍රදර්ශනය නැරඹීමට පැමිණේවි යැයි බලාපොරොත්තු වුව ද ජනතාවගේ උනන්දුව වැඩි නිසා එදින 10,000කට ආසන්න පිරිසක් පැමිණි බවට වාර්තා වේ යැයි අධ්‍යක්ෂවරයා සඳහන් කළේය.
පලතුරු පැළ මිලට ගන්න මිනිසුන්ගේ උනන්දුව වැඩියි. මේ ප්‍රදර්ශනයට සහභාගි වූ එක් පැළ තවානක් සඳහන් කළේ පළමු දින පැය 02ක් ඇතුළත පලතුරු පැළ විකිණීමෙන් රුපියල් 138,000ක මුදලක් ඉපැයූ බවයි. අලෙවි කුටියක් ඇති තවත් පැළ තවානක අයිතිකරුවෙකු ඊයේ වන විට රුපියල් 217,000ක මුදලක් පැළ අලෙවියෙන් ලබා ගත් බව සඳහන් කළ බවත් කෘෂිකර්ම දෙපාර්තමේන්තුවේ දිනක ආදායම රුපියල් ලක්ෂ 05ක් බවත් ඔහු පැවසීය.
කෘෂිකර්ම දෙපාර්තමේන්තුවේ මිල ස්ථාවර නිසා එයින් මිලදී ගන්නා පිරිස වැඩියි. පෞද්ගලික අංශයේ මිල වෙනස් වේ. උගුරැස්ස පලතුරු පැළ සඳහා ඉල්ලුම ඉහළ ගොස් ඇත. වෙරළු, රඹුටන්, දූරියන්, පැඟිරි පලතුරු වර්ග, අඹ හා අලිගැට පේර පැළ සඳහා වැඩි ඉල්ලුමක් පවතී. ඇතැම් පැළ වර්ග මේ වන විට අවසන් ව ඇති නිසා පැළ නැති බව සඳහන් කරමින් මිනිසුන් චෝදනා කරන බව පැවසූ අධ්‍යක්ෂවරයා මෙතරම් සෙනඟක් පැමිණේවි යැයි අපේක්ෂා නොකළ නිසා පලතුරු වෙළෙන්දෝ මෙන් ම තවාන් හිමියන් ද පැළ රැගෙන ආවේ අඩු ප්‍රමාණයක් බව පැවසීය.
මේ නිසා වැඩි වැඩියෙන් පැළ ගේන ලෙස විවිධ ප්‍රදේශවල පැළ තවාන් හිමියන්ට ආරාධනා කළ බව පැවසූ ඔහු කන්තලේ, රත්නපුර ප්‍රදේශවලින් පැළ රැගෙන විත් ඇතැයි ද වැඩිදුරටත් සඳහන් කළේය.
NDH
