ඒ අනුව කොළඹ විපස්සනා භාවනා මධ්‍යස්ථානය විසින් ලබා දෙනු ලැබූ රුපියල් මිලියන 1.2ක මුදලින් අවසන් මෙහෙයුමේදී සිය ජීවිතය රට වෙනුවෙන් පූජා කරන ලද 3 වන ගජබා රෙජිමේන්තුවේ සැරයන් වයි.ජී. තිලකරත්න රණ විරුවාගේ පවුලේ සාමාජිකයින් සඳහා ගජබා රෙජිමේන්තුවේ ඉංජිනේරුවන්ගේ හා සෙබළුන්ගේ ශ්‍රම දායකත්වයෙන් ඉදි කරන ලද නව නිවස එම රණ විරුවාගේ භාර්යාව වන ඊ.ජී. මංජුලා මල්කාන්ති මහත්මිය වෙත භාරදීම පසුගිය දින යුද හමුදාපති ලුතිතන් ජනරාල් දයා රත්නායක මහතාගේ ප්‍රධානත්වයෙන් සිදු කරන ලදී.
මෙම අවස්ථාව සඳහා වැඩම කරවන ලද මල්වත්ත පාර්ශවයේ පූජ්‍ය ආචාර්ය නියංගොඩ විජිතසිරි අනුනායක ස්වාමීන් වහන්සේ සහ කොළඹ විපස්සනා භාවනා මධ්‍යස්ථානයේ පූජ්‍ය මිල්ලෑවේ විජිත ස්වාමීන් වහන්සේ විසින් මෙම උත්සවයේ ආගමික වතාවත් සිදු කරන ලදහ.
යුද හමුදාපතිවරයා විසින් එහි ඵලකය නිරාවරණය කිරීමෙන් අනතුරුව සුභ මොහොතින් නිවස විවෘත කර එහි යතුරු හා ත්‍යාග පාර්සලයක් ද සැරයන් තිලකරත්නගේ භාර්යාව හා දරුවන් වෙත භාරදුන් අතර එම දරුවන්ගේ අධ්‍යාපන කටයුතු පිළිබඳ ව සොයා බැලීමට ද මෙහිදී අමතක නොකළේය.
මෙම අවස්ථාව සඳහා මධ්‍යම පළාත් ආණ්ඩුකාර ටිකිරි කොබ්බෑකඩුව, පළාත් සභාවේ සාමාජිකයින්, ගජබා රෙජිමේන්තුවේ ජ්‍යේෂ්ඨ නිලධාරීන් හා ප්‍රදේශයේ සැදැහැවතුන් විශාල ප්‍රමාණයක් ද සහභාගී වූහ.
DB/mod
