ඒ අනුව පෙත්සම මාර්තු මස 31 වැනිදා කැඳවීමට තීරණය කළ අධිකරණය එම නොතිසි සියලු වගඋත්තරකරුවන් වෙත යවන ලෙස නියම කෙළේය.
පෙරටුගාමී සමාජවාදී පක්ෂයේ ජනාධිපති අපේක්ෂක වූ දුමින්ද නාගමුව විසින් ගොනු කළ මෙම පෙත්සම අගවිනිසුරු කේ. ශ්‍රීපවන්, ප්‍රියසාත් ඩෙප්, ඊවා වනසුන්දර යන ශ්‍රේෂ්ඨාධිකරණ විනිසුරු මඬුල්ල ඉදිරියෙහි කැඳවන ලදී.
එහිදී නීතිපතිවරයා වෙනුවෙන් පෙනී සිටි රජයේ නීතිඥ අවන්ති පෙරේරා මෙනවිය මෙම පෙත්සමෙහි ඉදිරි කටයුතු සම්බන්ධයෙන් නීතිපතිවරයා වෙනුවෙන් සොලිසිටර් ජෙනරාල් සුහද ගම්ලත් මහතා පෙනී සිටින බවත්, පෞද්ගලික හේතූන් මත ඒ මහතා ඊයේ (18) අධිකරණයේ පෙනී නොසිටි බැවින් එය වෙනත් දිනයක කැඳවන ලෙසත් අධිකරණයෙන් ඉල්ලා සිටියාය.
පෙත්සම්කරු වෙනුවෙන් පෙනී සිටි නීතිඥ විරාන් කොරයා මහතා ඊට විරෝධයක් නොදැක්වූ අතර පෙත්සම සම්බන්ධ නොතිසි නීතිපතිවරයාට පමණක් යැවූ බව සඳහන් කෙළේය.
ඒ අනුව සෙසු වගඋත්තරකරුවන්ට ද නොතිසි යැවීමෙන් පසු පෙත්සම සලකා බැලීමට අධිකරණය තීරණය කෙළේය.
ජනාධිපතිවරයාට සේනාධිනායකයා ලෙස දිවයිනේ විවිධ ප්රදේශවල ත්‍රිවිධ හමුදාව ස්ථානගත කළ හැක්කේ මහජනතාවට පීඩාවක් වන්නේ නම් හෝ එවැනි තත්ත්වයක් උද්ගතව ඇත්නම් පමණක් බව පෙත්සමෙහි සඳහන් වේ. ඒ සඳහා එවැනි තත්ත්වයක් පාලනය කිරීමට පොලිසියට නොහැකි බව ද තහවුරු වී තිබිය යුතුය.
එහෙත් එබඳු තත්ත්වයක් නොතිබියදී ජනාධිපතිවරණ සමයේ හෝ ජනවාරි මස 09 වැනිදා අලුයම හිටපු ජනාධිපතිවරයා විසින් ත්‍රිවිධ හමුදාව කැඳවා දිවයිනේ විවිධ ප්රදේශවල ස්ථාන ගත කර තිබේ.
එය මහජන ආරක්ෂක පනතට පටහැනිව කටයුතු කිරීමක් බැවින් එමගින් මෙරට ජනතාවගේ මූලික අයිතීන් උල්ලංඝනය වූ බවට ප්‍රකාශ කරන්නැයි පෙත්සම්කරු අධිකරණයෙන් ඉල්ලා සිටී.
උපුටා ගැනීම: “දිනමිණ“ පුවත්පත
