හදිසි අවස්ථාවකදී ප්‍රශ්ණ කරමින් සිටීම නිවැරදි ප්‍රතිපත්තියක් නොවන අතර එවැනි අවස්ථාවක ගතයුතු කඩිනම් පියවර පිළිබඳ අවධානය යොමු කළ යුතුව තිබේ. ජීවිත ආරක්ෂාව වෙනුවෙන් කටයුතු කළ යුතුය.
ස්වදේශ කටයුතු අමාත්‍ය වජිර අබේවර්ධන මහතා ඒ සම්බන්ධයෙන් අදහස් පළ කරමින් මෙසේ සඳහන් කළේය.
"මීතොටමුල්ල ප්‍රදේශයේ පැවැති තත්ත්වය යටතේ බරපතල අනතුරුදායක තත්ත්වයක් වර්ධනය වෙමින් පවතින බව 2017-04-05 වන දින දහම්පුර ග්‍රාම නිලධාරීන් විසින් ප්රාදේශීය ලේකම් සිසිර කුමාර මහතා වෙත වාර්තා කර ඇත. ඒ මොහොතේම ක්‍රියාත්මක වූ ප්රාදේශීය ලේකම්වරයා ස්ථාන පරීක්ෂාවක් සිදුකර වහාම ඉවත් වන ලෙස වාචිකව උපදෙස් ලබා දී ඇතත් එයට ප්‍රතිචාරයක් නොමැති තැන ප්රාදේශීය ලේකම් විසින් කොළඹ දිසාපති සුනිල් කන්නංගර මහතා දැනුවත් කර ඇත.
එම අවස්ථාවේදීම දිසාපතිවරයා ප්රාදේශීය ලේකම්වරයාට උපදෙස් ලබා දී ඇත්තේ ලිඛිතව ලිපියක් මඟින් නිවෙස්වලට භාරදෙන ලෙසය. ඒ අනුව 2017-04-07 වන දින දහම්පුර ග්‍රාම නිලධාරී එච්. එම්. කුමාර මහතා විසින් ප්රධාන වශයෙන් අනතුරට මුහුණ දෙන නිවාස 10 ට ලිඛිතව ලිපි භාර දී ඇත.
ඉන් අනතුරුව මේ පිළිබඳව කොළඹ මහ නගර සභාවේ නාගරික කොමසාරිස් සහ කොළොන්නාව ප්රාදේශීය සම්බන්ධීකරණ කමිටුවේ සම සභාපතිවරුන්ට ද ලිඛිතව දන්වා ඇත. තවද කොළඹ දිසාපතිවරයා, නිවාස සංවර්ධන අධිකාරියේ සභාපති, නාගරික සංවර්ධන අධිකාරියේ සභාපති, කොලොන්නාව නගර සභාවේ ලේකම්, වැල්ලම්පිටිය පොලීසියේ ස්ථානාධිපති ආදීන් ද දැනුවත් කිරීමට කටයුතු කොට තිබේ.
ඇත්ත වශයෙන්ම රජයේ වගකීම ඉටුකරමින් රාජ්‍ය නිලධාරීන් කාර්යක්ෂම ලෙස කටයුතු කර තිබීම ඉතාමත් ප්‍රශංසනීය බව සඳහන් කළයුතුමය. තවද ජාතික ගොඩනැගිලි පර්යේෂණ සංවිධානයේ අධ්‍යක්ෂ ජනරාල්වරයා දැනුම්වත් කිරීමක් කර ඇත. කොළඹ මහදිසාපතිවරයා, ප්රාදේශීය ලේකම්වරයා, ග්‍රාම නිලධාරී මහතා ආදර්ශවත් ලෙස කටයුතු කර ඇති බව කිව යුතුය. "
මෙම සිදුවීම සිදුවීමට පෙරාතුව දහම්පුර ග්‍රාම නිලධාරී මහතා විසින් 2017-04-07 දින නිවාස වලට ලිපි භාර දී එම ලිිපි භාරගත් බවට ද අත්සන් තබා ඇති බව එම ලිපි නිරීක්ෂණය කිරීමේදී පැහැදි වේ.
ජීවිත 30ක් අප අතරින් සමුගෙන හමාරය. ඔවුන් සැමදෙනාගේම යැපෙන්නන්ව ආරක්ෂා කිරීමට ජනාධිපති මෛත්‍රීපාල සිරිසේන මැතිතුමා හා අග්‍රාමාත්‍ය රනිල් වික්‍රමසිංහ මැතිතුමාගේ මඟපෙන්වීමෙන් රජය පියවර ගෙන ඇත.
ඉදිරියේදී සිදු විය හැකි මෙවන් ඛේදවාචකයන් වළක්වා ගැනීම සඳහා ජනතාව දැනුම්වත් වීම වෙනුවෙන් මෙම තත්ත්වය හෙළි කිරීමට ස්වදේශ කටයුතු අමාත්‍ය වජිර අබේවර්ධන මහතා කටයුතු කර තිබේ.
මෙම ආපදා අවස්ථාවේදී ක්‍රියා කළ ත්‍රිවිධ හමුදාපතිතුමා ඇතුළු සියලු නිලධාරීන්ටත්, පොලිස්පතිතුමා ඇතුළු සියලුම නිලධාරීන්ටත්, කොළඹ නාගරික කොමසාරිස් බී.කේ.ඒ. අනුර මහතාටත්, කොළඹ දිසාපති සුනිල් කන්නන්ගර මහතාට, කොළොන්නාව ප්රාදේශීය ලේකම් සුගත් සිසිර කුමාර මහතාට, 511 ඒ දහම්පුර ග්‍රාම නිලධාරී එච්.එම්. කුමාර මහතාට, රජයේ විශේෂ ස්තූතිය හිමිවිය යුතු බව ද අමාත්‍යවරයා වැඩිදුරටත් සඳහන් කර තිබේ.
ජනතාව දැනුවත් කිරීම සඳහා නිලධාරීන් අතර හුවමාරු වූ ලිපි කිහිපයක් ද පහත සඳහන් වේ.
