ඉරානයට අයත් ‘IRIS Bushehr’ නෞකාව ත්රිකුණාමලය වරාය වෙත ගෙන ඒමට කටයුතු කරන බව ජනාධිපති අනුර කුමාර දිසානායක මහතා පවසයි.
මීට සුළු මොහොතකට පෙර ජනාධිපති ලේකම් කාර්යාලයේදී මාධ්ය අමතමින් ජනාධිපතිවරයා මේ බව පැවසීය.
එම නෞකාවේ සිටි 208ක් වූ කාර්ය මණ්ඩලය මේ වනවිට කොළඹ වරාය වෙත රැගෙන ඒමට අවශ්ය කටයුතු සිදුකරමින් සිටින බවද ජනාධිපතිවරයා වැඩිදුරටත් පැවසීය.
ශ්රී ලංකාවේ භූමිය, මුහුදු කලාපයන් සහ ගුවන් කලාපය කිසිදු රාජ්යයකට ගැටුම්වලදී පක්ෂපාති ආකාරයෙන් භාවිත කිරීමට හෝ වෙනත් රටකට පීඩාවක් ඇතිවන ආකාරයෙන් භාවිත කිරීමට ඉඩ නොදෙන බවද ජනාධිපතිවරයා මෙහිදී අවධාරණය කළේය.
වැඩිදුරටත් අදහස් දක්වමින් ජනපතිවරයා පැවසුවේ,
“ඕනෑම ජාත්යන්තර ගැටුමකදී අපේ ස්ථාවරයේ අපේ මධ්යස්ථභාවය, අපි අපේ භූමිය, අපේ මුහුදු කාලාපයන්, අපේ ගුවන් කලාපයන් කිසිසේත්ම කවර හෝ රාජ්යයකට ගැටුමේදී පක්ෂපාති ආකාරයට හෝ කවර හෝ රාජ්යයකට පීඩාවක් ගෙනදෙන ආකාරයේ කටයුතු කරන්න ඉඩදෙන්නේ නැහැ. එ තමයි අපේ ස්ථාවරය. ඒ නිසා ගැටුම ආරම්භ වූ මොහොතේම අපි ගනු ලැබූ ක්රියාමාර්ග අපි කරනු ලැබූ ප්රකාශයන් මේ සියල්ල මේ ස්ථාවරය මත පදනම්ව තමයි අපි කටයුතු කරමින් තිබෙන්නේ. ඒ අනුව තමයි ඉරානයේ නෞකාවන් දෙකක් පිළිබඳව ප්රශ්නය මතුවී තිබෙන්නේ එහිදීත් අපි අනුගමන කරමින් තිබෙන්නේ මධ්යස්ථභාවය. ඒ වගේම ජාතියක් සහ රාජ්යයක් ලෙස කිසිසේත්ම මධ්යස්ථාභාවය ආරක්ෂාකරන ගමන් මුනුෂත්වය අපි අංක එකට තියෙනවා. ඒ නිසා අපි කිසිසේතම පැකිලෙන්නේ නැහැ මනුෂත්වය ආරක්ෂා කර ගැනීම සඳහා, මිනිස් ජීවිත ආරක්ෂා කර ගැනීම සඳහා ගතයුතු ක්රියාමාර්ග තිබෙනවානම් ඒ ක්රියාමාර්ග ගැනීමට අපි කිසිසේත්ම පැකිලෙන්නේ නැහැ. මම හිතනවා එය තමයි රාජ්යයකට ගතයුතු ඉතාමත් හොඳම ප්රතිපත්තිය. අපි ඒ ප්රතිපත්තිවල ඉදගෙන කටයුතු කරනවා.”
