2030 වසර වන විට ශ්රී ලංකාවේ නිමි තේ නිෂ්පාදනය කිලෝග්රෑම් මිලියන 400 දක්වාත්, තේ අපනයන ආදායම ඇමෙරිකානු ඩොලර් බිලියන 2.5 දක්වාත් ඉහළ නැංවීමේ ජාතික ඉලක්කය සාක්ෂාත් කර ගැනීමේ අරමුණින්, වැවිලි සහ ප්රජා යටිතල පහසුකම් අමාත්යාංශය විසින් “Ceylon Tea Village” (සිලෝන් ටී විලේජ්) හෙවත් තේ ගම්මාන 500ක් ස්ථාපිත කිරීමේ ජාතික වැඩසටහන ක්රියාත්මක කිරීමට නියමිතය.
මෙම වැඩසටහන ශ්රී ලංකාවේ කුඩා තේවතු අංශය නවීකරණය කිරීම, ගොවි ජනතාවගේ ජීවන තත්ත්වය ඉහළ නැංවීම සහ තේ කර්මාන්තයේ තිරසාර සංවර්ධනය වේගවත් කිරීම අරමුණු කර ගෙන ක්රියාත්මක කෙරේ.
මෙම වැඩසටහන යටතේ කුඩා තේවතු ගොවීන්ගේ දළු අස්වැන්න හා ඵලදායිතාව ඉහළ නැංවීම, ගොවි ආදායම වර්ධනය කිරීම, අගය එකතු කළ තේ නිෂ්පාදන ප්රවර්ධනය කිරීම, තේ කර්මාන්තය සංචාරක කර්මාන්තය සමඟ ඒකාබද්ධ කිරීම, නවීන හා තිරසාර වගා තාක්ෂණ හඳුන්වාදීම, යටිතල පහසුකම් සංවර්ධනය කිරීම සහ නිෂ්පාදන සමූපකාර ක්රමය ශක්තිමත් කිරීම ඇතුළු ප්රමුඛ අරමුණු රැසක් ක්රියාත්මක කිරීමට සැලසුම් කර ඇත.
සෑම තේ ගම්මානයක් සඳහාම අධිඝණත්ව තේ වගා ආදර්ශන බිම්, නව තේ පැළ තවාන්, කුඩා තේ වතු සඳහා රක්ෂණ ආවරණයක්, කුඩා තේවතු ගොවීන් සඳහා විශ්රාම වැටුප් ක්රමයක්, සහනදායී ණය පහසුකම්, යාන්ත්රීකරණයට අත්වැල, Handmade තේ නිෂ්පාදනය සඳහා පුහුණුව හා උපකරණ, සංචාරක කර්මාන්තය සමඟ බද්ධ කිරීම, අතිරේක ආදායම් මාර්ග සංවර්ධනය සඳහා සහාය හා මඟපෙන්වීම, නිෂ්පාදන සමූපකාර ක්රමය ශක්තිමත් කිරීම, පුනර්ජනනීය කෘෂිකර්මාන්තය පිළිබඳ දැනුම හා පුහුණුව මෙන්ම යටිතල පහසුකම් සංවර්ධනය සඳහා ප්රමුඛතාව ලබාදෙන සමෝධානික තේ ගම්මාන සංවර්ධන පැකේජයක් ක්රියාත්මක කරනු ලැබේ.
මෙම වැඩසටහනේ පළමු අදියර යටතේ 2026 වසර තුළ දිවයින පුරා පිහිටි තේ පරීක්ෂක කොට්ඨාස 144ම ආවරණය වන පරිදි තේ ගම්මාන 144ක් ආරම්භ කිරීමට සැලසුම් කර ඇත. මෙම වැඩසටහනේ සමාරම්භක උත්සවය 2026 ජූලි 15 වන දින නුවරඑළිය දිස්ත්රික්කයේ කොත්මලේ ප්රාදේශීය ලේකම් කොට්ඨාසයේ හල්ගොල්ල, හපුගස්තලාව ප්රදේශයේදී පැවැත්වීමට නියමිතය. එදිනම තේ වගාව සිදුකරන දිස්ත්රික්ක 11ක් ආවරණය වන පරිදි තේ ගම්මාන 144හි වැඩසටහන් නිල වශයෙන් ආරම්භ කෙරෙනු ඇත.
සමාරම්භක දිනයේදී ප්රධාන දිස්ත්රික්ක නියෝජනය කරමින් පහත තේ ගම්මානවලදී ද වැඩසටහන් ආරම්භ කෙරේ.
- නුවරඑළිය දිස්ත්රික්කය – කොත්මලේ, හල්ගොල්ල ගම්මානය
- මහනුවර දිස්ත්රික්කය – පන්විලතැන්න, කහවත්ත ගම්මානය
- බදුල්ල දිස්ත්රික්කය – ඌවපරණගම, ලකීලෑන්ඩ් ගම්මානය
- ගාල්ල දිස්ත්රික්කය – නියාගම, වත්තහේන ගම්මානය
- මාතර දිස්ත්රික්කය – දෙනියාය, කිරිවැල්දොල ගම්මානය
- කළුතර දිස්ත්රික්කය – ඉත්තෑපාන, පරෙයිගම ගම්මානය
- රත්නපුර දිස්ත්රික්කය – කලවාන බටහිර, දොලහේන ගම්මානය
- කෑගල්ල දිස්ත්රික්කය – ගලිගමුව, මල්වාන ගම්මානය
- මීට අමතරව හම්බන්තොට, මාතලේ සහ මොණරාගල දිස්ත්රික්කවල ද ජූලි 15 වන දිනට සමගාමීව “Ceylon Tea Village” වැඩසටහන නිල වශයෙන් ආරම්භ කිරීමට නියමිතය.
මෙම ජාතික වැඩසටහන ශ්රී ලංකාවේ කුඩා තේවතු අංශයේ තිරසාර සංවර්ධනය, ගොවි ජනතාවගේ ආදායම් වර්ධනය, තේ කර්මාන්තයේ නවීකරණය සහ ග්රාමීය ආර්ථිකය ශක්තිමත් කිරීම සඳහා වැදගත් පියවරක් වන අතර, 2030 ජාතික සංවර්ධන ඉලක්ක සපුරා ගැනීම සඳහා ද ප්රබල දායකත්වයක් ලබාදෙනු ඇත.
