ජාතික මහාමාර්ග පුළුල් කිරීමේ සහ වැඩිදියුණු කිරීමේ වැඩසටහන යටතේ වරකාපොළ අතුරු මාර්ගයේ ඉතිරි ඉදිකිරීම් කටයුතු අවසන් කිරීම සඳහා M/s Maga Engineering (Pvt) Ltd වෙත කොන්ත්රාත්තුව පිරිනැමීමට අමාත්ය මණ්ඩල අනුමැතිය හිමිව තිබේ.
ජාතික මහාමාර්ග සංවර්ධන වැඩසටහන සඳහා වෙන් කර ඇති අරමුදල් භාවිත කරමින්, වරකාපොළ අතුරු මාර්ගයේ කිලෝමීටර 0+000 සිට කිලෝමීටර 2+320 දක්වා කොටසේ ඉතිරිව ඇති ඉදිකිරීම් කටයුතු අවසන් කිරීමට සැලසුම් කර ඇත.
මෙම ව්යාපෘතිය සඳහා සුදුසු කොන්ත්රාත්කරුවෙකු තෝරා ගැනීම පිණිස ජාතික තරගකාරී ප්රසම්පාදන ක්රමවේදය යටතේ ලංසු කැඳවා ඇති අතර, ඒ සඳහා ලංසු හයක් ඉදිරිපත් වී තිබේ.
ලංසු ඇගයීමෙන් අනතුරුව ඉහළ මට්ටමේ ප්රසම්පාදන කමිටුව විසින් ඉදිරිපත් කරන ලද නිර්දේශ මත, සාරානුකූලව ප්රතිචාරාත්මක අවම ලංසුකරු ලෙස හඳුනාගත් M/s Maga Engineering (Pvt) Ltd වෙත අදාළ කොන්ත්රාත්තුව පිරිනැමීමට තීරණය කර ඇත.
ඒ අනුව, ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක මහතා විසින් ඉදිරිපත් කරන ලද යෝජනාව අනුව අමාත්ය මණ්ඩලය විසින් රුපියල් බිලියන 4.99ක මුදලකට (එකතු කළ අගය මත බදු රහිතව) එම කොන්ත්රාත්තුව පිරිනැමීම අනුමත කර තිබේ.
මෙම ව්යාපෘතිය මඟින් මාර්ග යටිතල පහසුකම් වැඩිදියුණු කිරීම, ප්රවාහන කාර්යක්ෂමතාව ඉහළ නැංවීම සහ ප්රදේශයේ ආර්ථික ක්රියාකාරකම් සඳහා පහසුකම් සැලසීම අපේක්ෂා කෙරේ.
