පවතින අධික වැසි සහිත කාලගුණ තත්ත්වයත් සමඟ නායයාම් අනතුරු ඇඟවීම් යාවත්කාලීන කර ඇතැයි ජාතික ගොඩනැගිලි පර්යේෂණ සංවිධානය සදහන් කරයි.
එම නිවේදනය අද (22) පෙරවරු 6.00 සිට හෙට (23) වන දින පස්වරු 6.00 දක්වා වලංගු වනු ඇත.
ඒ අනුව, කෑගල්ල දිස්ත්රික්කයේ දෙහිඕවිට සහ රත්නපුර දිස්ත්රික්කයේ රත්නපුර ප්රාදේශීය ලේකම් කොට්ඨාස සඳහා තුන්වන මට්ටමේ “ඉවත්වන්න” (රතු) නායයාම් අනතුරු ඇඟවීමක් නිකුත් කර තිබේ.
දෙවන මට්ටමේ “අවදානයෙන් සිටින්න” (ඇම්බර්) අනතුරු ඇඟවීම් කොළඹ දිස්ත්රික්කයේ සීතාවක සහ පාදුක්ක, ගම්පහ දිස්ත්රික්කයේ අත්තනගල්ල, කළුතර දිස්ත්රික්කයේ ඉංගිරිය සහ බුලත්සිංහල, කෑගල්ල දිස්ත්රික්කයේ රුවන්වැල්ල සහ රත්නපුර දිස්ත්රික්කයේ පැල්මඩුල්ල, කුරුවිට සහ අයගම ප්රදේශ සඳහා නිකුත් කර තිබේ.
එමෙන්ම පළමු මට්ටමේ “විමසිලිමත් වන්න” (කහ) අනතුරු ඇඟවීම් කෑගල්ල දිස්ත්රික්කයේ යටියන්තොට, නුවරඑළිය දිස්ත්රික්කයේ අඹගමුව සහ රත්නපුර දිස්ත්රික්කයේ ඇහැලියගොඩ, නිවිතිගල සහ කලවාන ප්රදේශ සඳහා නිකුත් කර ඇත.
