අමරපුර නිකායේ අනුනායක පදවිය වෙනුවෙන් සන්නස්පත්‍රය පිළිගැන්වේ

අමරපුර නිකායේ අනුනායක පදවිය වෙනුවෙන් සන්නස්පත්‍රය පිළිගැන්වේ
  • SocialShare:

ශාස්ත්‍රවේදී දෙබත්ගම සෝමරතන තිස්ස  නායක ස්වාමීන්වහන්සේ වෙත  ශ්‍රි  ඉන්දජෝති වංශාවලංකාර  ශ්‍රී රතනජෝති වංශාවතංස  ගෞරව නාමය සහිත ශ්‍රී ලංකා අමරපුර මහා නිකායේ මූලවංශික පාර්ශවයේ අනුනායක ධුරය සඳහා වන සන්නස් පත්‍රය පිරිනැමීම ඊයේ(02)  පස්වරුවේ අරණායක දෙබත්ගම ශ්‍රී රතනජෝත්‍යාරාම ධර්ම මන්දිරයේදී සිදු කෙරිණ.

අනුනායක ස්වාමීන් වහන්සේ වෙනුවෙන් රචිත ආශිංසන ග්‍රන්ථ පිරිනැමීම සම්පාදක ස්වාමීවහන්සේලා සිදු කළහ.  අනතුරුව අනුනායක පදවිය වෙනුවෙන් වූ සන්නස් පත්‍රය පිරිනැමීම අග්‍රාමාත්‍ය ආචාර්ය හරිනි අමරසූරිය සිදු කළාය.

විජිනිපත පිළිගැන්වීම පරිසර අමාත්‍ය වෛද්‍ය ධම්මික පටබැඳි සිදු කළ අතර ප්‍රසාද පූජා පැවැත්වීම පාර්ලිමේන්තු මන්ත්‍රී නන්ද බණ්ඩාර,නන්දන මිල්ලගල ඇතුලු මහජන නියෝජිතයින්, රාජ්‍ය නිලධාරීන් සහ  දායක සභාවේ සාමාජිකයින් සිදු කළේය.

බුදු දහමෙි චිරස්ථිතිය වෙනුවෙන් දෙබත්ගම සෝමරතන තිස්ස නායක හිමියන්  සිදු කළ මෙහෙය  ඇගයීමට ලක් කළ අග්‍රාමාත්‍යතුමිය ඉදිරි ශාසනික මෙහෙවර වෙනුවෙන් ශුභාශිංසන මෙහිදී  පිරිනැමීය. 

අමරපුර මූලවංශික පාර්ශවයේ මහා නායක අහුංගල්ලේ විමලධම්ම තිස්ස නාහිමියන් ප්‍රධාන මහාසංඝරත්නය, මහජන නියෝජිතයින්, රාජ්‍ය නිලධාරීන් ඇතුලු දායක දායිකාවන් විශාල පිරිසක් මෙම අවස්ථාවට සහභාගී වූහ.

Image
Image

අප ගැන

රජයේ නිල පුවත් වෙබ් අඩවිය පවත්වාගෙන යනු ලබන්නේ රජයේ ප්‍රවෘත්ති දෙපාර්තමේන්තුවේ නව මාධ්‍ය ඒකකය මගිනි.