ජනපතිගේ ඉන්දියානු සංචාරය මෙතෙක් ඉන්දියාව සහ ශ්‍රී ලංකාව ඇති සබඳතා නව අදියරකට ඔසවා තැබූ බව විදේශ කටයුතු අමාත්‍ය විජිත හේරත් මහතා පැවසීය.
ජනාධිපතිවරයාගේ ඉන්දියානු සංචාරය පිළිබඳ දැනුම්වත් කිරීම සඳහා රජයේ ප්‍රවෘත්ති දෙපාර්තමෙන්තුවේ අද (20) පෙරවරුවේ පැවති විශේෂ ප්‍රවෘත්ති සාකච්ඡාකදී ඔහු මේ බව පවසා සිටියේය.
මෙරට රාජ්‍ය නායකයෙකුට ලබා දිය හැකි උපරිම ගෞරවය ඉන්දියානු රජය ලබාදුන් බවද සඳහන් කළේය.
රටට සහ රටේ ජනතාවට එම ගෞරවය හිමි වෙනවා ජනාධිපති අනුර කුමාර දිසානායක මහතා ඉන්දීය අග්‍රාමාත්‍ය නරේන්ද්‍ර මෝදි මහතා ඇතුළු ඉන්දීය රාජ්‍ය තාන්ත්‍රිකයින් රැසක් සමග සාකච්ඡා පැවැත් වූ බවත්, එමගින් ආර්ථික දේශපාලන සංස්කෘතික සහ සමාජ ආරක්ෂණමය බැඳීම් තවදුරටත් තහවුරු වූ බවත් අමාත්‍යවරයා පෙන්වා දුන්නේය.
මෙරට බලශක්ති ආයෝජන ඇතුළු ක්ෂේත්‍ර රැසක වර්ධනය සඳහා සහාය ලබාදීම පිළිබඳ ද සාකච්ඡාවට ලක් වූ බව අමාත්‍යවරයා පැවසීය.
විශේෂයෙන්ම දකුණු ඉන්දියානු ධීවරයින් මෙරට මුහුදු සීමාවේ සිදුකරන අනවසර ධීවර කටයුතු සම්බන්ධයෙන්ද මෙම සංචාරයේදී විශේෂයෙන් සාකච්ඡා වීතිබේ. දීර්ඝ කාලයක් තිස්සේ මුහුණදෙන මෙම ගැටලුව සඳහා ස්ථිරසාර විසඳුමක් ලබා දීමට කඩිනමින් මැදිහත් වීමට දෙපාර්ශවයම එකඟ වී තිබේ.
ඉන්දියානු ණය යෝජනා යටතේ ක්‍රියාත්මක වන නිවාස ව්‍යාපෘති තවත් ශක්තිමත්ව ඉදිරියට ගෙනයාමට තවදුරටත් ඒ සඳහා සහාය ලබා දීමට එකඟ වී තිබේ.
ඉන්දීය රජයේ ණය ආධාර මත ඉදිකරන මහව ඔිමන්ත දුම්රිය මාර්ගය ණයක් නොව ඉන්දීය රජයේ ප්‍රදානයක් බවට පත්කිරීම ද මෙම සංචාරයේදී ලැබූ විශාල ජයග්‍රහණයක් බව විදේශ කටයුතු අමාත්‍යවරයා අවධාරණය කළේය.
ඉන්දියානු මහාබෝධී සමාගමට ලැබෙන විදේශ ආධාර ලබා ගැනීමට මෙතෙක් පැවති නීතිමය බාධා ඉවත් කිරීමට සහ එම ගැටලු විසඳීමට ද එකග වී තිබේ.
මෙරට ණය ප්‍රතිව්‍යුහගතකරණය සඳහා ඉන්දියාව ලබා දුන් සහ ලබා දෙන සහයෝගයට ශ්‍රී ලංකා රජය සිය ස්තූතිය ප්‍රකාශ කර තිබේ.
ඉන්දියාවේ තෙල් නළයක් ලංකාවට එළීමේ එකඟතාවකට පැමිණි බවට ප්‍රවෘත්ති නිර්මාණය කිරීම සාවද්‍ය බව ද අමාත්‍යවරයා වැඩිදුරටත් පැවසීය.
