ආරම්භක පිතිකරුවන් ලෙස පිටියට පිවිසි නායක දිමුත් කරුණාරත්න සහ ළහිරු තිරිමාන්න එක්ව පළමු කඩුල්ල වෙනුවෙන් ගොඩනංවන ලද වාර්තා ගත ලකුණු 209 ක ලකුණු සම්බන්ධතාවත් සමඟ පලමු දිනය අවසාන වන විට ශ්‍රී ලංකා පිළ ඉතා ප්‍රභල ස්ථානයකට පැමිණීමට සමත්ව තිබේ.

වසර 21 කට පසු ශ්‍රී ලංකා පිතිකරුවන් දෙදෙනෙකු ශ්‍රී ලංකාව තුළදී ලකුණු 200 ඉක්මවා රැස් කරගත් පළමු අවස්ථාව ලෙස දැක්විය හැක. අවසන් වරට මෙරටදී ලකුණු 200 සීමාව පසුකරමින් 2000 වසරේදී සනත් ජයසූරිය සහ මාවන් අතපත්තු විසින් පාකිස්තානයට එරෙහිව ලකුණු 335 ක් රැස් කිරීමට සමත් විය.

නායක දිමුත් කරුණාරත්න ලකුණු 118ක් රැස්කර සිටියදී ශොරිෆුල් ඉස්ලාම්ගේ පන්දුවක් හමුවේ කඩලු රකින ලින්ටස් දාස් හට උඩ පන්දුවක් ලබා දෙමින් දැවී ගියේය. ඊයේ(29) දිනයට තරඟය නතර කරන විට ළහිරු තිරිමාන්න ලකුණු 131 ක් හා ඕෂද ප්‍රනාන්දු ලකුණු 40 ක්ද ලබා නොදැවී ක්‍රීඩා කරමින් සිටී. අද(30) තරගයේ දෙවැනි දිනයයි.

-Sri Lanka Cricket-