සමාජ සවිබල ගැන්වීම් සුබසාධන හා උඩරට උරුමයන් පිළිබඳ අමාත්‍ය එස්.බී. දිසානායක මහතාගේ උපදෙස් මත සමෘද්ධි අධ්යක්ෂ ජෙනරාල් නීල් බණ්ඩාර හපුහින්න මහතාගේ අධීක්ෂණය යටතේ මෙම ආධාර වැඩසටහන ක්‍රියාත්මක වන අතර කළුතර දිස්ත්‍රික්කයේ අගලවත්ත කොට්ඨාසයට ප්‍රමුඛත්වය ලබා දෙමින් ආධාර පාර්සල් 5000ක් ඊයේ (10) දෙපාර්තමේන්තුව සතු ලොරි රථවලින් කළුතර දිස්ත්‍රික්කයට ප්‍රවාහනය කරන ලදි.
වෙළෙඳපොලේ රුපියල් 1250ක් පමන වටිනාකමකින් යුත් දත්බුරුසු, සබන් , බිම පිරිසිදු කිරීමේ බුරුසු, ලයිසෝල් , හාපික් වැනි ද්‍රව්‍ය මෙම පාර්සලයට අඩංගු බව සමෘද්ධි සංවර්ධන දෙපාර්තමේන්තුව පවසයි.
ජනාධිපතිවරයා විසින් ගංවතුරෙන් හා නායයාම්වලින් විපතට පත් අගලවත්ත ප්‍රදේශයේ ජනතාවට සහන සැලසීමේ කමිටුවේ ප්‍රධානියා ලෙස අමාත්‍ය දිසානායක මහතා පත්කරනු ලැබූ අතර පසුගියදා ඇමැතිවරයා අගලවත්ත, වලල්ලාවිට, පාලින්දනුවර ප්‍රාදේශීය ලේකම් කොට්ඨාසවල තත්ත්වය සොයා බැලීමේ නිරීක්ෂණ චාරිකාවක ද නිරත විය.
එම ප්‍රදේශවලට අමතරව දිවයිනේ සෙසු ප්‍රදේශවල විපතට පත් ජනතාව වෙනුවෙන්ද සමෘද්ධි සංවර්ධන දෙපාර්තමේන්තුව මෙම පිරිසිදු කිරීමේ ද්‍රව්‍ය පාර්සල් ලබා දෙන බව සමෘද්ධි අධ්යක්ෂ ජනරාල් නීල් බණ්ඩාර හපුහින්න මහතා පවසයි.
