සමහර ග්‍රාමීය පාසල් ප්‍රාථමික පන්ති වලදී ගණන් කිරීම සඳහා මෙම ඔලිඳ බීජ භාවිතා කරනු ලබන බවත් මෙම බීජ අතිශයින් විෂ සහිත නිසා ඉතා භයානක බැවින් පන්ති කාමර තුළ මේවා භාවිතය නතර කළ යුතු බවත් අහම්බෙන් මේවා සැපීමෙන් දරුවන්ට මාරාන්තික විය හැකි බවත් ජාතික විෂ තොරතුරු මධ්‍යස්ථානයේ ප්‍රධානී වෛද්‍ය වරුණ ගුණතිලක මහතා පැවසීය.
ඔලිඳ බීජ අහඹු ලෙස සැපීම් හා ගිලීම පිළිබඳ ව තම ඒකකයට දෙමාපියන්, ගුරුවරුන් සහ වෙනත් අයගෙන් නිරතුරුවම ඇමතුම් ලැබෙන බවත් පසුගිය වසර දෙක තුන තුළ මේ නිසා සිදු වූ මරණ කිහිපයක් ද වාර්තා වී ඇති බවත් ඔහු පෙන්වා දෙයි.
තද රතු සහ කළු පැහැවන මෙම බීජවලට දරුවන් ආකර්ෂණීය වන බැවින් ඔවුන් එය හැපීමට හෝ ගිලීම සඳහා නිතැතින්ම පෙළඹිය හැකි බවත් එහි ප්‍රතිඵලය මාරක විය හැකි බවටත් ඔහු අනතුරු ඇඟවීය.
පන්ති කාමර ක්‍රියාකාරකම් සඳහා ප්‍රමාණයෙන් විශාල හා ආරක්ෂිත මදටිය බීජ හෝ ද ඉතා ආරක්ෂිත හා විෂ සහිත නොවන වන සියඹලා බීජ භාවිතා කිරීම වඩා යෝග්‍ය බවත් ඒ මහතා සඳහන් කළේය.
ශ්‍රී ලංකා වියළි කලාපයේ පහත් බිම්වල වන ලැහැබවල වැවෙන ඔලිඳ ඖෂධීය ගුණ අඩංගු බව පැවසේ. පර්යේෂණ අධ්‍යයන අනුව, වණ, තුවාල සහ බල්ලන්, බළලුන් හා මීයන් හැපීමෙන් හටගන්නා හොරි සුව කිරීමට සාම්ප්‍රදායික අත් බෙහෙතක් ලෙස භාවිතා කරයි.
කෙසේ වෙතත් ඔලිඳ බීජ දරුවන් සඳහා මාරක විය හැකි බැවින් පන්ති කාමර ක්‍රියාකාරකම් සඳහා මෙම බීජ ගෙන ඒමෙන් වැළකීම සුදුසු බවත් මෙම විෂ සහිත බීජ වර්ග පිළිබඳ වැඩිදුරටත් තොරතුරු ලබා ගැනීමට අවශ්‍ය ඕනෑම අයෙකුට 2686143 යන හොට්ලයින් අංකයෙන් අමතා අවශ්‍ය තොරතුරු ලබා ගත හැකි බවත් ආචාර්ය ගුණතිලක මහතා පැවසීය.
SDF
