2015 ජනවාරි 05 දින මධ්‍යම රාත්‍රියෙන් පසු කිසිදු මැතිවරණ කොට්ඨාස මට්ටමේ මධ්‍යගත කාර්යාලයක, ඡන්ද ප්‍රදේශ කාර්යාලයක හෝ කිසිදු අවසරලත් නිවේදිත ඡන්ද කාර්යාලයක ප්‍රචාරක පුවරු, පෝස්ටර් හෝ සැරසිලි ප්‍රදර්ශනය කළ නොහැක. එබැවින් එවැනි ස්ථානවල ඇති සියලු ම ප්‍රචාරක පුවරු හා සැරසිලි 2015 ජනවාරි 05 දින මධ්‍යම රාත්‍රියෙන් පසු ඉවත් කරගන්නා ලෙස සියලු ම අපේක්ෂකයන් හා ආධාරකරුවන්ගෙන් ඉල්ලා සිටිනු ලැබේ.
2015 ජනවාරි 06 දින පෙරවරුවේ මෙවැනි ස්ථාන පරීක්ෂා කිරීමට දිස්ත්‍රික්/ ප්‍රාදේශීය මූලස්ථානවල පොලිස් නිලධාරීන්ගෙන් හා විමර්ශන නිලධාරීන්ගෙන් සමන්විත කණ්ඩායම් පැමිණෙනු ඇත. අවසරලත් නිවේදිත පක්ෂ කාර්යාලවල ඇති ප්‍රචාරක පුවරු ඉවත් කරවීම ජනවාරි 06 දින සිට සිදු කරනු ලැබේ.
එමෙන්ම 2015 ජනවාරි 07 දින පෙරවරුව වනවිට ඡන්ද කොට්ඨාස මට්ටමින් පිහිටුවා ඇති පක්ෂ කාර්යාල ද ඉවත් කර ගත යුතු අතර, ඡන්ද විමසීම් නීතියට අනුකූල නොවන ලෙස පවත්වාගෙන යන කාර්යාල වෙතොත් ඒවා ඉවත් කිරීමට ද පියවර ගනු ලැබේ.
සාමකාමී හා සාධාරණ ඡන්ද විමසීමක් පැවැත්වීම සහතික කරනු වස් ඉහත කරුණුවලට අනුකූලතාව දැක්වීමෙන් සහයවන ලෙස සියලු ම අපේක්ෂකයන් හා ඔවුන්ගේ ආධාරකරුවන්ගෙන් කාරුණිකව ඉල්ලා සිටිනු ලැබේ.
තරග කරන දේශපාලන පක්ෂවල ලේකම්වරුන් හා එම පක්ෂවල ජ්‍යේෂ්ඨ නිලධාරීන් මේ සම්බන්ධයෙන් ස්වකීය අපේක්ෂකයන් හා ක්‍රියාකාරීන් කඩිනමින් දැනුවත් කිරීමට ක්‍රියා කරනු ඇතැයි ද කාරුණිකව අපේක්ෂා කෙරේ.
SDF
