මැතිවරණ ප්‍රචාරක කටයුතු පසෙකලා සහන කටයුතුවලට ප්‍රමුඛත්වය ලබා දෙන මෙන් විපතට පත් දිස්ත්‍රික්කවල සියලු දේශපාලකයන්ගෙන් ජනාධිපතිතුමා ඉල්ලීමක් කර ඇති අතර විපතට පත් ජනතාවගේ සුබසාධන කටයුතු සඳහා රජයෙන් රුපියල් මිලියන 500ක මුදලක් ආපදා කළමනාකරණ අමාත්‍යංශයට වෙන්කර දී තිබේ.

දකුණු, බස්නාහිර, සබරගමුව, ඌව, උතුරු, මධ්‍යම, වයඹ, නැඟෙනහිර සහ උතුරු මැද පළාත්වලින් ආපදාවට ලක් වූවන් වාර්තා වන අතර ජීවිත හානි 30ක් ද තුවාලකරුවන් 20ක් හා අතුරුදහන් වූවන් 6ක් ද වාර්තා වේ.

නිවාස 4742ක් පූර්ණ වශයෙන් හානියට පත් ව ඇති අතර නිවාස 15237කට අර්ධ හානි සිදු ව තිබේ. අද උදෑසන 9.00 වනවිට ආරක්ෂිත ස්ථාන 636ක පවුල් 33346ක 116190 දෙනෙකුට නවාතැන් සලසා දී තිබේ.
 
ජලයෙන් යටවීම නිසා නිවාසවලින් ඉවත්කළ ජනතාවට පිසූ ආහාර හා අත්‍යවශ්‍ය සේවාවන් සැපයීම අදාළ දිස්ත්‍රික් ලේකම්වරුන් හරහා නොකඩවා සිදු කෙරේ.