මැතිවරණ ප්‍රචාරක කටයුතු පසෙකලා සහන කටයුතුවලට ප්‍රමුඛත්වය ලබා දෙන මෙන් විපතට පත් දිස්ත්‍රික්කවල සියලු දේශපාලකයන්ගෙන් ජනාධිපති මහින්ද රාජපක්ෂ මැතිතුමා ඉල්ලීමක් කරයි. ජලගැලීම්වලින් විපතට පත් ගොවින් සඳහා බීජ වී සහ අනෙකුත් අවශ්‍ය සැපයුම් ලබා දෙන මෙන් ද ජනාධිපතිතුමා නිලධාරීන්ට උපදෙස් දෙයි.
දකුණු, බස්නාහිර, සබරගමුව, ඌව, උතුරු, මධ්‍යම, වයඹ, නැඟෙනහිර සහ උතුරු මැද පළාත්වලින් ආපදාවට ලක් වූවන් වාර්තා වන අතර ජීවිත හානි 24ක් ද තුවාලකරුවන් 16ක් හා අතුරුදහන් වූවන් 8ක් ද වාර්තා වේ.
නිවාස 4593ක් පූර්ණ වශයෙන් හානියට පත් ව ඇති අතර නිවාස 14649කට අර්ධ හානි සිදු ව තිබේ. අද මධ්‍යහන 12.00 වනවිට ආරක්ෂිත ස්ථාන 568ක පවුල් 31188ක 106788 දෙනෙකුට නවාතැන් සලසා දී තිබේ.
ජලයෙන් යටවීම නිසා නිවාසවලින් ඉවත්කළ ජනතාව ආරක්ෂිත ස්ථානවල නවාතැන් ගෙන සිටින අතර ඔවුන්ට පිසූ ආහාර හා අත්‍යවශ්‍ය සේවාවන් සැපයීම අදාළ දිස්ත්‍රික් ලේකම්වරුන් හරහා නොකඩවා සිදු කෙරේ.
