දිවයිනේ විවිධ ප්‍රදේශයන්ට ආවේණික වූ සාම්ප්‍රදායික ආහාර වර්ගයන් පිළිබඳ ව වත්මන් සමාජය දැනුවත් කිරීම හා එකි ආහාර වර්ග වත්මන් සමාජයට හඳුන්වාදීමේ අදහස පෙරදැරිකරගෙන සෑම පළාත්වලටම ගොස් කරන ලද පූර්ව ගවේෂණයකින් අනතුරුව ඒ ඒ ප්‍රදේශවලට ආවේණික ආහාරපානවල රස හා ගුණාත්මකභාවය රැකෙන අයුරින් යුද හමුදාවේ විවිධ රෙජිමේන්තුවල සිටින දක්ෂ සූපවේදීන් සහභාගී
කරවාගෙන මෙම වැඩසටහන ක්‍රියාත්මක කරන අතර මෙහි පළමුවැන්න නුවරඑළිය නගරයේ ද, දෙවැන්න මාතර නගරයේ ද, තෙවැන්න මීගමුව නගරයේ ද පවත්වන ලද අතර සිවුවැන්න මෙම දෙසැම්බර් මස 24 - 28 දින දක්වා බත්තරමුල්ල අපේගම ප්‍රදේශයේ ද පවත්වනු ලබන බව මධ්‍යම පළාත් භාර ආරක්ෂක සේනා ආඥාපති මේජර් ජෙනරාල් යූ.ඒ.බී. මැදවෙල මහතා පැවසීය.
ඒ මහතා මේ බව ප්‍රකාශ කළේ ඊයේ (16) මාධ්‍ය කේන්ද්‍රයේ පැවැති මාධ්‍ය සාකච්ඡාවක දී ය.
මෙ තුළින් යුද හමුදා සාමාජිකයන්ගේ සැඟවුණ දස්කම් එළිදැක්වීම මෙන් ම රටේ විවිධ පළාත්වල ප්‍රචලිත ආහාර ද්‍රව්‍ය එක ම ස්ථානයකදී මිලදී ගැනීමේ නවමු අත්දැකීම ශ්‍රී ලාංකික ජනතාවට ලැබෙන බව ද පැවසූ මැදවෙල මහතා මෙම දිනවලදී මෙම ප්‍රදේශය පුරා යුද හමුදා කැලිප්සෝ කණ්ඩායම් විසින් සංගිත කටයුතු සිදු කරනු ලබන බව ද ඔවුන් විසින් සෑම අවස්ථාවකදී ම එකම ගීතය වාදනය හා ගායනය මඟින් විසුරුවා හැරීම මෙහි පැමිණෙන අයවලුන්හට අත්විඳීමට ලැබෙන විශේෂ අත්දැකිමක් වනු ඇති බවද වැඩිදුරටත් පවසා සිටියේය.
එසේම පැරණි සිංහල ජන ක්‍රීඩා මෙන් ම ආත්ම විශ්වාසය වර්ධනය කිරීමේ වැඩසටහන් ද මෙය නැරඹීම සඳහා එන අයගේ ආස්වාදය සඳහා සූදානම් කර ඇති බවත් එමඟින් ඒ සම්බන්ධව අධ්‍යාපනික දැනුමක් ලබාගැනීමට හැකිවන බවද මැදවෙල මහතා මෙහිදී වැඩිදුරටත් අවධාරණය කර සිටියේය.
DB
