තම පර්යේෂණයන්හි ජාත්‍යන්තර තත්ත්වය කරා ළඟාවීමට තරම් සාර්ථකත්වයක් හිමි කරගත් විද්‍යාඥයන් නිසි ඇගයීමට ලක්කිරීම සඳහා ජනාධිපති පර්යේෂණ සම්මාන ක්‍රමය හඳන්වාදෙනු ලැබිණ. මෙරට විද්‍යාඥයන් විසින් සිදුකරනු ලැබූ පර්යේෂණ අගයමින් මෙම සම්මාන පිරිනැමීම සිදු කෙරෙන අතර, වෛද්‍ය, කෘෂිකර්ම, පාරිසරික, සමාජ විද්‍යාත්මක, දන්ත වෛද්‍ය හා ඉංජිනේරු මෙන්ම අනෙකුත් සෙසු විෂය පථයන් ආවරණය කරමින් 2010, 2011 හා 2012 වසරවල දී පර්යේෂණ සිදු කළ විද්‍යාඥයන් 318 දෙනෙකු ජනාධිපති සම්මානයෙන් පිදුම් ලැබීමට නියමිතය.
ගෝලීය වශයෙන් විද්‍යාවෙහි ප්‍රගමනය උදෙසා ඵලදායී අයුරින් දායකත්වයක් ලබාදෙමින් රටෙහි අභිවෘද්ධිය උදෙසා පර්යේෂණයන් සිදුකිරීම සඳහා විද්‍යාඥයන් දිරිගැන්වීම තාක්ෂණ හා පර්යේෂණ අමාත්‍යාංශයට අනුබද්ධ ආයතනයක් වන ජාතික පර්යේෂණ සභාව විසින් සිදු කරනු ලබයි. රටෙහි කැපී පෙනෙන ජාතික විද්‍යාත්මක සහ තාක්ෂණික ප්‍රජාවන් ගොඩනැගීම උදෙසා විද්‍යා හා තාක්ෂණ ක්ෂේත්‍රයේ පර්යේෂණයන් සැළසුම් කිරීම, සම්බන්ධීකරණය සහ පහසුකම් සැළසීම සඳහා රජයට සහය වන්නේ ජාතික පර්යේෂණ සභාවයි.
MAP
