මිලෙනා සැන්ටානා රමිරේස් මහත්මියගේ සේවය අගයා අග්‍රාමාත්‍යවරයා පවසා සිටියේ, දශක තුනකට වැඩි කාලයක් තුළ ශ්‍රී ලංකාවේ යුද්ධය පැවති වකවානුවේ එල්.ටී.ටී.ඊ. සංවිධානය විශාල වශයෙන් මනුෂ්‍ය ඝාතන සිදු කරමින් මානව හිමිකම් උල්ලංඝනය කළත්, කිසිදු බටහිර රටක් ඒවා නැවැත්වීමට හෝ සාමය වෙනුවෙන් සාකච්ඡා පැවැත්වීමට ඉදිරිපත් වුණේ නැහැ. රජයක් ලෙස වාර ගණනාවක්, ලංකාවේ මෙන්ම, විදේශීය රටවලත් සාම සාකච්ඡා පැවැත්වුවත් ඔවුන් විසින්ම ඒවා උල්ලංඝනය කරමින් ඔවුන් විසින් නැවත නැවතත් යුද්ධයට අවතීර්ණ වූ බවය. අවසානයේ දී ජනාධිපති මහින්ද රාජපක්ෂ මැතිතුමාගේ නිවැරදි මග පෙන්වීම මත ත්‍රස්තවාදය නිමා කිරීමට හැකි වූ අතර, අද උතුරු නැගෙනහිර විශාල සංවර්ධන මාවතකට යොමු වී ඇති බව සඳහන් කළේය.
උගත් පාඩම් කොමිසමේ නිර්දේශ ක්‍රියාත්මක කරමින් දෙමළ ජනතාවට සාධාරණයක් ඉටු කිරීමට රජය හැම විටම ක්‍රියා කරමින් සිටින බවත් සඳහන් කළේය. මෙම සාධාරණ පිළිවෙතට විරුද්ධව ඇතැම් බටහිර ජාතීන් විසින් විවිධ කුමන්ත්‍රණ අප රටට එරෙහිව ක්‍රියාත්මක කිරීමට සූදානම් වන අවස්ථාවල වෙනිසියුලානු රජය අපට පක්ෂව කටයුතු කිරීම ගැන තානාපතිතුමිය වෙත සිය ප්‍රසාදය පළ කළේය.
කෙසේ වෙතත්, ඉදිරියටත් ශ්‍රී ලංකා රජයට සහාය පළ කිරීමට වෙනිසියුලා රජය සූදානමින් සිටින බවත්, දෙරටේ වෙළඳ කටයුතු වර්ධනය කර ගැනීමට සූදානමින් සිටින බවත් සඳහන් කළාය. මෙම අවස්ථාවට, අග්‍රාමාත්‍ය ලේකම්, එස්. අමරසේකර මහතා ද සහභාගි විය.
ECB
