දිවයිනට බලපා ඇති අයහපත් කාලගුණික තත්ත්වය හේතුවෙන් ඇති වී තිබෙන ගංවතුර තත්වයෙන් විපතට පත්වී සිටින ජනතාව මුදාගැනීම සඳහා අමතර යුද හමුදා භට පිරිස් යොදවා ඇතැයි යුද හමුදා මාධ්‍ය ප්‍රකාශක කර්නල් සංජීව දිසානායක මහතා පවසයි.
පවතින ආපදා තත්ත්වය සම්බන්ධයෙන් පැහැදිලි කිරීම සඳහා අද (14) රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවට එක්වෙමින් මාධ්‍ය ප්‍රකාශකවරයා මේ බව පැවසීය.
ඕනෑම ආපදා තත්ත්වයකට මුහුණදීම සඳහා මුළු දිවයිනම ආවරණය වන පරිදි 6500කට වැඩි භට පිරිසක් අවශ්‍ය ස්ථානවල සූදානම් වී ඇතැයිද ඒ මහතා පෙන්වා දුන්නේය.
මිට අමතරව කොළඹ, කළුතර, ගාල්ල, මාතර, රත්නපුර, හම්බන්තොට, ගම්පහ හා පුත්තලම යන දිස්ත්‍රික්කවල ඇති විය හැකි හදිසි අපදා තත්ත්වයකදි යෙදවිම සඳහා යුනි බෆල් රථ හා යුනිකෝන් රථ, බෝට්ටු සුදානම් කර ඇති බවද යුද්ධ හමුදා මාධ්‍ය ප්‍රකාශකවරයා වැඩිදුරටත් පැවසීය.
