අපගේ සාම්ප‍්‍රදායික චාරිත‍්‍ර වාරිත‍්‍ර ඇදහිලි පාරම්පරික කර්මාන්ත ආදිය වර්තමාන සමාජය තුළින් ගිලිහී යාම නිසා දැයේ දරුවන්ගේ අනාගතයේ අභිවෘද්ධියටත්, පැරණි සාම්ප‍්‍රදායන් මතු පරපුරට හඳුන්වා දීමට හා වියැකී යන චාරිත‍්‍ර සහ සිරිත් ආරක්ෂා කිරීම අරමුණු කර ගනිමින් ජාතික උරුමයන් අමාත්‍යාංශය මෙම වැඩසටහන ආරම්භ කර තිබේ.
මෙමගින් කොහොඹා යක් කංකාරිය, තිස්පැයේ පිරිත, ලාක්ෂා කර්මාන්තය, දහ අට සන්නිය, සේසත් කර්මාන්තය ආදිය මුල් අදියර වශයෙන් විකාශය කිරීමට නියමිතය.
එමෙන් ම මෙම වැඩ සටහන් සංයුක්ත තැටිවල පටිගත කොට සහ අත්පොත් මුද්‍රණය කොට බෙදාහැරීමට ද අපේක්ෂා කරනු ලබයි. මෙහි තිබෙන තවත් විශේෂත්වයක් වන්නේ සාම්ප‍්‍රදායික පාරම්පරික ශිල්පීන් යොදා ගනිමින් පැරණි ගැමි පරිසරය තුළ මෙම වැඩසටහන් රූගත කිරීමයි.
උරුම ප‍්‍රවර්ධන වැඩසටහන යටතේ ශ‍්‍රී ලංකාවේ අප‍්‍රකට හා පුරාවිද්‍යා ස්ථානවල නොදන්නා පැතිකඩයන් සහිත පුරාවිද්‍යා ස්ථාන 100ක් රූගත කොට සිංහල, ඉංග්රීසි භාෂාවෙන් හඬකවා දමිළ උපශීර්ෂ සහිත ව ප‍්‍රචාරය කිරීමට මෙම උරුම ප‍්‍රවර්ධන හා සංරක්ෂණ ව්‍යාපෘති මගින් ක‍්‍රියාත්මක කිරීමට නියමිතය.
මෙමගින් සංචාරක ආකර්ෂණය ලබා ගැනීමත්, අප‍්‍රකට පුරාවිද්‍යා ස්ථාන පිළිබඳ දේශීය හා විදේශීය ජනතාවට දැනුම ලබා දීමත් ප‍්‍රධාන අරමුණ වේ. මෙම ව්‍යාපෘතිය සඳහා ඇස්තමේන්තු මුදල රුපියල් මිලියන 100කි.
ශ‍්‍රී ලංකාව වැනි ස්පර්ශනීය උරුමයන් හා අස්පර්ශනීය උරුමයන් බහුල රටක දියුණුව සඳහාත් සංචාරක කර්මාන්තයේ දියුණුව, ජනතා ආකර්ෂණය හා නැවත පිබිදීම මෙන් ම ඒවා ආශ‍්‍රිත ජීවනෝපාය ගෙනයන්නන්ගේ ආර්ථිකය සවිබල ගැන්වීම මුල් කරගෙන මෙම ව්‍යාපෘතිය ක‍්‍රියාත්මක කරනු ලබයි.
