පෙරහැර වීථි සංචාරය කිරීමට පෙර මංගල හස්‌තිරාජයා මත සධාතුක කරඬුව තැන්පත් කිරීම විශේෂ ව්‍යාපෘති අමාත්‍ය එස්‌. එම්. චන්ද්‍රසේන මහතාගේ සුරතින් සිදු කෙරිණි.
අනුරාධපුර අටමස්‌ථානාධිපති උතුරුමැද පළාතේ ප්‍රධාන සංඝනායක ආචාර්ය පල්ලේගම සිරිනිවාස සහ ස්‌වර්ණමාලි චෛත්‍යරාමාධිකාරී නුවර කලාවියේ ප්‍රධාන සංඝනායක ශාස්‌ත්‍රපති පල්ලේගම හේමරතන යන නාහිමිවරුන්ගේ අනුශාසනා මත උතුරුමැද පළාතේ ප්‍රධාන ඇමැති එස්‌. එම්. රංජිත් සමරකෝන් මහතාගේ මූලිකත්වයෙන් මෙම පෙරහැර සංවිධානය කොට තිබිණි.
අනුරාධපුර පූජා නගරය හා නව නගරය ආශ්‍රිතව වීථි සංචාරය කළ මෙම පෙරහරට අලුත් නුවර රාජා හස්‌තියා ඇතුළු අලි ඇතුන් දොළොස්‌දෙනකු සහ නර්තන අංග සියයකට වැඩි සංඛ්‍යාවක්‌ ඇතුළත් විය.
පෙරහර අවසානයේ දිය කැපීම පසුගිය ඉරිදා අලුයම ප්‍රධාන අමාත්‍යවරයාගේ සහභාගිත්වයෙන් මල්වතු ඔයේදී සිදුකෙරිණි.
