එමනිසා එම වැව්වල ඇති සැල්විනියා ඇතුළු ආගන්තුක පැළෑටි වර්ග ඉවත් කර මත්ස්‍ය වාසයට සුදුසු පරිදි එම වැව් සකස් කිරීම සඳහා රුපියල් මිලියන 05 බැගින් දිස්ත්‍රික් ලේකම්වරු වෙත ලබා දෙන ලෙස අමාත්‍යවරයා ධීවර අමාත්‍යාංශයේ නිලධාරින්හට උපදෙස් දුන්නේය. පළාත් ධීවර අමාත්‍ය සමුළුවේ දී ගන්නා ලද තීරණ අනුව ධීවර ජීවනෝපාය සංවර්ධන ව්‍යාපෘති සඳහා ද රු. මිලියන 05ක් බැගින් ලබා දී ඇති නමුත්, ඒවා තවමත් අදාළ ව්‍යාපෘති සඳහා යොදවා නොමැති නම් ඒවා ද මෙම වැව් ප්‍රතිසංස්කරණ කටයුතු වෙනුවෙන් යොදවන ලෙස ද අමාත්‍යවරයා වැඩිඳුරටත් උපදෙස් දෙනු ලැබීය.
කෙසේ වුවද සැල්වීනියා හා ජපන් ජබරවලින් වැව් වැසී යාම නිසා මද වැස්සක දී වුවද වැව් වාන් දමන අතර, වැව්වලට මුදා හරින මත්ස්‍ය පැටවුන් වැව් වානෙන් පිටතට ගලා යන ජලය සමග ඇදී යයි. එමනිසා අපේක්ෂිත මත්ස්‍ය අස්වැන්න ඉළක්කය සපුරා ගැනීම බොහෝදුරට අවම වන අතර වැව් වාන් දමන විට මත්ස්‍ය පැටවුන්ට පිටවිය නොහැකි අන්දමට, වැව් වාන සුදුසු දැළක් දමා ආවරණය කළ හැකි අන්දමේ වැඩ පිළිවෙළක් ක්‍රියාත්මක කරන ලෙස ද අමාත්‍යවරයා නිලධාරින්ට පැවසීය. මෙම කරුණු අමාත්‍යවරයා අනාවරණය කරන ලද්දේ පසුගියදා ධීවර අමාත්‍යාශයේ දී පැවැති ධීවර උපදේශක සභා රැස්වීමට සහභාගි වෙමිනි.
