ධීවර අමාත්‍යවරයාගේ සංකල්පයකට අනුව ක්‍රියාත්මක කරන ලද මෙම වැඩපිළිවෙළ යටතේ සියයට 50ක සහනාධාර යටතේ බහුදින ධීවර යාත්‍රා 10ක් ප්‍රථම අදියර යටතේ ඉදි කිරිමේ කටයුතු 2016 වසරේ නොවැම්බර් මස සිට අරඹනු ලැබීය.
රාජ්‍ය ආයතනයක් වන සී- නෝර් පදනම විසින් මෙම බහුදින ධීවර යාත්‍රා නිපදවීම අරඹන ලද අතර මෙම එක් ධීවර යාත්‍රාවක වටිනාකම රු. මි. 70කි. ඉන් සියයට 50ක් වියදම රජය විසින් දරනු ලබයි. මෙ ධීවර යාත්‍රාවලින් මසුන් ඇල්ලීමේ දී දැල් භාවිතාවක් සිදු නොවන අතර, දැනට ජාත්‍යන්තර පිළිගත් ක්‍රමවේදය වන මරුවැල් හෙවත් Long line නැමැති පන්න ක්‍රමය භාවිතා කරයි. මසුන් ආරක්ෂිතව, ඔවුන්ගේ ගුණාත්මකභාවයට හානි නොවන පරිදි ගබඩා කිරීමේ පහසුකම් මෙහි අන්තර්ගතය.
දැනට මසුන් ඇල්ලීමේ දී පසු අස්වනු නාස්තිය සියයට 40කි. සාගරයේ දී අල්ලා ගොඩට ගෙන එන මසුන්ගෙන් සියයට 40ක් පාරිභෝජනයට සුදුසු තත්ත්වයක නොපවතී. මෙම පසු අස්වනු නාස්තිය අවම කිරීම සඳහාත්, ජාත්‍යන්තර මුහුදේදී වැඩි මසුන් ප්‍රමාණයක් අල්ලා ගැනීම සඳහාත්, විශේෂයෙන් අපනයනය ඉළක්ක කර ගනිමින් මත්ස්‍ය සම්පත් නෙලා ගැනීම සඳහාත්, මෙම බහුදින ධීවර යාත්‍රා නිපදවීමට පියවර ගන්නා ලදී.
