එහිදී උතුරු පළාත් ආණ්ඩුකාරතුමා වෙනුවෙන් උතුරු පළාත් සෞඛ්‍ය අධ්‍යක්ෂක එස්.ආර්. ජූඩ් මහත්මිය විසින් එම යාත්‍රාව ජනාධිපතිතුමන් වෙතින් නිල වශයෙන් භාර ගන්නා ලදී.
මෙම අවස්ථාවට ධීවර හා ජලජ සම්පත් සංවර්ධන අමාත්‍ය මහින්ද අමරවීර, ආරක්ෂක රාජ්‍ය අමාත්‍ය රුවන් වි‍ජේවර්ධන සහ උතුරු පළාත් සෞඛ්‍ය හා දේශීය වෛද්‍ය, සමාජ සේවා හා පුනරුත්ථාපන, පරිවාස හා ළමාරක්ෂක සේවා සහ කාන්තා කටයුතු අමාත්‍ය පද්මනාදන් සත්‍යලිංගම් මහත්වරු ඇතුළු නිලධාරීන් පිරිසක් ද සහභාගි වූහ.
නාවික හමුදාපති වයිස් අද්මිරාල් රවීන්ද්‍ර විජේගුණරත්න මහතාගේ උපදෙස් හා මගපෙන්වීම මත නිෂ්පාදිත අඩි 47.5ක දිගකින් යුත් මෙම යාත්‍රාව කඩිනම් ප්‍රතිකාර අවශ්‍යතා ඇති උතුරු ප්‍රදේශයේ දුපත්වල වෙසෙන ජනතාවට ඉතා ඉක්මනින් ප්‍රධාන රෝහල් කරා ගමන් කිරීමට උපකාරී වනු ඇත.
වැලිසර, නාවික හමුදා වෙරළබඩ මුර යාත්‍රා නිෂ්පාදනය කිරීමේ ව්‍යාපෘතිය මගින් දේශීය තාක්ෂණය සහ නාවික හමුදා නව්‍යකරණ හැකියාවන් භාවිතා කරමින් නිෂ්පාදනය කර ඇති මෙම යාත්‍රාවෙන් එකවර රෝගීන් 15 දෙනෙකු හට ප්‍රවාහන පහසුකම් සැලසිය හැකිවේ. ගිලන් ඇඳන් තුනකින් ද, ඔක්සිජන් සිලින්ඩර් දෙකකින් ද, එන්නත් නික්ෂේපන ආධාරකවලින් ද, රුධිර පීඩනය මැනීමේ උපකරණ සහ රෝගී තත්ත්ව නිරීක්ෂණය කිරීමේ උපකරණ පද්ධතියකින්ද සමන්විත මෙම යාත්‍රාව නිෂ්පාදනය සඳහා නාවික හමුදාව රුපියල් මිලියන 37ක පිරිවැයක් දරා ඇත. රළු මුහුදු තත්ත්වයන් යටතේ ගමන් කිරීමේදී වුවද රෝගීන් හට සිදුවන අපහසුතා අවම වන පරිදි මෙම යාත්‍රාව විශේෂිතව නිෂ්පාදනය කර ඇත.
ඩෙල්‍ෆ්ට් ජැටියේ ස්ථානගත කිරීමට නියමිත මෙම යාත්‍රාව සඳහා නාවික හමුදා කාර්ය මණ්ඩලයක් ද යෙදවෙනු ඇත.
navy.lk
