මධ්‍යම පළාත් සභා ශ්‍රවණාගාරයේ පසුගියදා පැවැති ‘නුවණින් වලකමු මහමග අනතුරු’ තේමාව යටතේ මාර්ග අනතුරු වැලැක්වීමේ අරමුණින් ක්‍රියාත්මක ප්‍රවාහන සතියේ සමාරම්භක උත්සවයට සහභාගි වෙමින් එදිරිසිංහ මහතා මේ තොරතුරු අනාවරණය කලේය.
රිය අනතුරු හේතුවෙන් දිනකට 7ත් 8ත් අතර ප්‍රමාණයක් මිය යන අතර වාර්ෂිකව 2500 කට අධික පිරිසක් මියයනවා. යුද්ධයේ දරුණු කාලයේදීවත් නොවු තරම් පිරිසක් වාර්ෂික ආබාධිතයන් බවට පත් වන බවද, රිය අනතුරු හේතුවෙන් තුවාල වුවන් වෙනුවෙන් වාර්ෂිකව රුපියල් බිලියන ගණනක් රජය වැයකරන බවද ඒ මහතා පැවසීය.
නමුත් දැනුවත් කිරීම තුලින් අපිට මේ අනතුරු රැසක් වලක්වගන්න පුළුවන්. ඩෙංගු වලක්වා ගැනීම සදහා විශාල ප්‍රචාරණයක් ගෙනයනවා. නමුත් ඩෙංගු හේතුවෙන් මිය යන පිරිස මෙන් විසිගුණයක් මිය යන රිය අනතුරු පිළිබද වැඩි අවධානයක් යොමු නොකිරීම ශෝචනීය තත්ත්වයක් බවද ඔහු අවධාරණය කළේය. රථවාහන අනතුරු අවම කරගැනීම සදහා රජයේ මැදිහත් වීම පුළුල්ව අවශ්‍ය බවද ඒ මහතා තවදුරටත් පැවසීය.
මෙහිදී මධ්‍යම පළාත් ප්‍රවාහන සතියට සමගාමීව දිස්ත්‍රික් මට්ටමින් මාර්ග ආරක්ෂණ ඒකක පිහිටුවා ඇති අතර මහනුවර දිස්ත්‍රික් මාර්ග ආරක්ෂණ ඒකකයේ සභාපති වරයා වශයෙන් මහනුවර දිස්ත්‍රික් ලේකම් එච්.එම්.පී. හිටිසේකර මහතා පත්කරගනු ලැබීය.
AP/DMU-Kandy
